Ǵázzel múlkiniń sultanı Alisher Nawayınıń tuwılǵanına 579 jıl tolıwı múnásebeti menen respublikamız boylap ádebiy kesheler, hár qıylı ilajlar, ashıq sabaqlar ótkerilip atır.

Usınday ashıq sabaqlardıń birin Qaraqalpaq filologiyası hám jurnalistika fakultetiniń ámelyatshı studenti Qosımbetova Aygúl I.Yusupov atındaǵı qánigelestirilgen mektep-internatınıń 9-^b klasında ótti.

Tárbiya saatında ótkerilgen ashıq sabaq dástúriy emes usılda 3 basqıshta bolıp ótti.

Sabaqtı pán muǵallimi A.Áwezbaeva ashıp berdi. Ámelyatshı Qosımbetova Aygúl Alisher Nawayınıń ómiri hám dóretiwshiligi boyınsha bayanat isledi. Bayanattan soń klastıń belsendi oqıwshıları da shayırdıń ǵázzellerinen kórkemlep oqıp berdi.

Konferenciya kórinisinde ótkerilgen ashıq sabaqtıń úshinshi bóliminde oqıwshılar shayırdıń ómiri hám shıǵarmaları boyınsha erkin sáwbetlesiw ótkerdi. Sáwbet barısında oqıwshılar Alisher Nawayı hám shıǵarmaları boyınsha qızıqtırǵan sorawlarına ámeliyatshı A.Qosımbetovadan juwaplar aldı.

Juwmaqlap aytqanda, shayırdıń tuwılǵan kúnine arnap ótkerilip atırǵan bunday ashıq sabaqlar jaslardıń ruwxıy dúnyasın bayıtıwǵa, shayır miyrasların ele de kóbirek úyreniwge túrtki boladı. Bunday ashıq sabaqlardıń ámelyatshılar tárepinen ótiliwi olardıń alǵan teoriyalıq bilimleriniń jaqsı nátiyje berip atırǵanınan derek beredi.

Turdıbek Naurızbaev,

Qaraqalpaq filologiyası hám jurnalistika fakulteti studenti.