“Янги Ўзбекистон” газетасининг 2020 йил 17 апрель кунги сонида Ўзбекистон Республикаси Олий Мажлис Қоунчилик палатаси спикери Нурдинжон Исмоиловнинг “Етакчилик халққа хизмат қилмоқ демакдир” мавзуидаги мақоласини шунчаки ўқиб бўлмайди, уни чуқур тушуниш, англаш керак. Чунки, муаллиф унда модерн жамиятдаги сиёсий етакчилик хусусиятлари, етакчи формаси ва унинг шахси хусусида ёзади. Сиёсий етакчилик халқнинг хоҳиш-иродасини юзага чиқарадиган, энг асосийси юртга хизмат қиладиган фаолият тури эканлигини аниқ мисоллар билан исботлаб беради. Фанда турли талқинларга эга ушбу етакчилик тури мақолада тугал ва аниқ, халқона ўз исботини топган деб ҳисоблайман.  

Бугун дунёда “Ўзбек модернизацияси” феномени кўпчиликни ҳай  рон қолдираётир. Бу эса ўз ўзидан Ўзбекистонни ўрганишга бўлган уринишларда кўринади. Жанубий Кореалик ёзувчи ва журналист Чо Чоль Хён ўзбек сиёсий етакчиси Президент Шавкат Мирзиёев ҳақидаги ёзган асарида Ўзбекистоннинг “топ” реформаларини Президент шахси билан боғлаб, сиёсий етакчиликнинг бу мамлакатда халққа хизмат қилиш билан уйғунлашганини кўрсатиб беради.

Нурдинжон Исмоиловнинг мақоласини айнан мана шу сиёсий етакчиликнинг феномен сифатида ёзилганлиги билан қадрлайман. Айниқса, Президентнинг сиёсий етакчи сифатида халқни бирлаштириш ва келажакни кўра олишдек юксак фазилатлари ҳаётий мисоллар билан мақолада янада тўлиқтирилганлиги унга куч, жозиба берган деб ўйлайман.

2016 йил Президент Шавкат Мирзиёев бугуннинг энг асосий муаммосига мукаммал ечим топган ва эътибор қаратган эди. Буни қарангки, соғлиқни сақлаш соҳасини янада такомиллаштириш борасидаги ўша пайтдаги муҳим эътибор бугун учун қанчалар зарур ва аҳамиятли бўлаётганини шу кун исботлаётир. Коронавирус инфекциясига қарши курашда олиб борилаётган ушбу ислоҳатлар кўпчиликни ҳайрон колдирмоқда. Хусусан, вирус билан касалланганларнинг сифатли тиббий ёрдам олиши ва тезда тузалиши дунё ҳамжамиятининг эътирофига сазовар бўлди. Муаллифнинг айнан шу фикрларни билдириши ўз вақтида айтилаётган тўғри муносабат бўлгани жуда аҳамиятлидир. Шу билан бирга, Н.М.Исмоилов сиёсий етакчи томонидан бугун учун ўта долзарб бўлган қарорларнинг ўз вақтида қабул қилинаётганлиги, бу эса халқнинг яхши яшаши, карантин даврида ваҳимага тушмаслиги учун муҳим омил бўлаётганлигини эътиборга олади. Озиқ-овқат хавфсизлиги ва томорқа ерлардан тўғри фойдаланиш тўғрисидаги муаллифнинг фикрлари, ўйлайманки, сизни ушбу мақолани ўқишга ундайди.

Якуний гап сифатида айтмоқчиманки, мақолада бугуннинг гапи, шу кунги Ўзбекистон ва келажакдаги халқнинг манфаатлари, орзу-умидларининг ечими кўрсатилган.

М.М.Ибрагимов

Олий Мажлис Қонунчилик палатаси депутати,

ЎзЛиДеП фракцияси аъзоcи.