(Устазым, профессор Гульнара апа Утемуратоваға!)

Көзим көзиңизге уқсамас бәлким,
Лекин, кеўлим кеўлиңиздиң нусқасы,
Меҳриңиз жүрегим жылытты ҳәр күн,
Дегим келер сизди қәлбим устасы.

Устаз тутып, жақын билдим анамдай,
Тик қәддиңиз көрип артты ықласым,
Сырым айтып еркелеймен балаңдай,
Қәлемейсиз, төгилиўин көз жасым.

Қосықлар жазайын тарыйхта өшпес,
Азық алып, йошлы сөзлериңизден,
Тәрбиялаған атам, анам кеширмес,
Жүрмей қалсам басқан излериңизден.

Тилек билдирейин сөзлерди қурап,
Медаллар безесин өңириңизди,
Гүзде туўылғансыз билемен бирақ,
Бәҳәр тәрк етпесин өмириңизди.

Қәдирли, қымбатлы Гүльнара апа,
Бараман сиз барған узын жоллардан,
Бахтыма саў болғайсыз бәрҳәма,
Хүрмет пенен, шәкиртиңиз Айшолпан!!!

Айшолпан Оразымбетова,
ҚМУ магистранты, Зульфия атындағы мәмлекетлик сыйлықтың лауреаты.

21.05.2020