Universitetimiz Hayal-qızlar keńesi tárepinen “Jaslardı qollap-quwatlaw hám xalıqtıń salamatlıǵın bekkemlew jılı” hám 8-mart Hayal-qızlar bayramına arnap “Dáwir qızları” atamasındaǵı student-qızlar tańlawı bolıp ótti. Tańlawdı ótkeriwdegi tiykarǵı maqset – student-qızlardıń oqıwda hám jámiyetlik jumıslarda belsendiligin arttırıw, olarda ana Watanǵa sadıqlıq, pidayılıq sezimlerin ele de rawajlandırıw, shańaraqqa, keleshek turmısqa tayarlaw, ózleri tańlaǵan qánigeliklerine súyispenshiligin arttırıw, milliy úrp-ádetlerimizdi, dástúrlerimizdi, ádep-ikramlılıq, iybelilik sıyaqlı paziyletlerdi boyına sıńdiriw bolıp tabıladı. Tańlawǵa on tórt fakultetten tórt student-qız quramında dúzilgen, on tórt topar qatnasıp, tiykarınan tórt shárt tiykarında óz ara bellesti.
Eń dáslep, “Sálemnama” shártinde topar aǵzaları óz dóretiwshilik talǵamınan kelip shıqqan halda, ózlerin, fakultetin, qánigeligin tanıstırdı.
2021-jıl mámleketlik dástúrinde belgilengen maqset hám wazıypalardıń áhmiyeti haqqında aytıp berip, siyasiy sawatqanlıǵın kórsete aldı. Al ekinshi shártte student-qızlardıń mádeniyatlı kiyiniwi ádepliliktiń eń joqarı belgisi ekenligin, oqıw ornında kiyiniw mádeniyatına qalay ámel etiw kerek ekenligin, ózleri jaratqan kiyim úlgileri tiykarında kórsetip berdi. “Epli kelin kerek pe, sepli kelin kerek pe?….” muzikalı, házil-dálkek shártinde bolsa, toparlar turmısta hám shańaraqta bolatuǵın hár qıylı waqıyalardı saxnalıq kórinislerde sáwlelendirdi. Usı tiykarda student-qızlardıń sózge sheshenligi, aktyorlıq sheberligi bahalandı. Al eń sońǵı, “Bilimli qızlar – jámiyet baxtı” shártinde bolsa, topar sárdarlarına siyasiy hám turmıslıq baǵdarda sorawlar berilip, olardıń bilim dárejesi sınnan ótkerildi.
1-mart kúngi tańlaw juwmaǵı boyınsha Dene mádeniyatı fakulteti qızları 1-orın, Ekonomika hám Shet tilleri fakulteti 2-orın, Kórkem-óner fakulteti student-qızları 3-orındı iyeledi. Al 2-mart kúngi tańlaw juwmaǵı boyınsha 1-orın Ximiya-texnologiya fakulteti, 2-orın Qaraqalpaq filologiyası hám jurnalistika fakulteti, 3-orın Ózbek filologiyası fakulteti qızlarına nesip etti. Sonday-aq eń belsendi qatnasqan fakultet toparları húrmet jarlıqları hám estelik sawǵaları menen, student-qızlar bolsa “Eń epli qız”, “Eń iybeli qız”, “Eń bilimli qız” h.t.b nominaciyaları menen sıylıqlandı.
Qaraqalpaq filologiyası hám jurnalistika fakulteti
studenti Biybixadisha Joldasbaeva
