Ózbekstan Respublikası Prezidentiniń 2019-jıl, 27-may sánesindegi PQ-5729-sanlı pármanı tiykarinda Qaraqalpaq mámleketlik universiteti Yuridika fakultetinde shólkemlestirilgen “Jaslar korrupciyaǵa qarsı” klubınıń rejesine muwapıq usı jıl 5-mart kúni taraw qániygeleri hám studentler menen gezektegi dόńgelek stol jıynalısı bolıp ótti.
Jıynalısqa Ózbekstan Respublikası Senatı aǵzası B.Matmuratov, Xojeli rayonı hákimi J.Ermashev, Qaraqalpaqstan Respublikası Prokuraturası bólimi aǵa prokurorı X.Kushimatov, Qaraqalpaqstan Respublikası Ádillik ministrligi bólim qániygesi N.Qutlımuratova, Yuridika fakulteti dekanı E.Qutıbaeva, “Jaslar korrupciyaǵa qarsı” klubı baslıǵı S.Utemuratova, sonday-aq, professor-oqıtıwshılar hám studentler qatınastı.
Dóńgelek stol átirapında bolǵan sáwbetlesiwde korrupciya túsinigi, onıń jinayiy-huquqiy hám kriminologiyalıq sıpatlaması, korrupciyanıń aldın alıwda hàm korrupciyaǵa qarsı gúresiwde unamlı nátiyjelerge ersiken mámleketler yaģniy Daniya, Singapur hàm Qıtay tájiriybelerin korrupciyanıń aldın alıw hám oǵan qarsı gúresiw tarawında, mámleket siyasatın qáliplestiriw hám ámelge asırıw, mámleket organları, Ǵalaba xabar qurallari, puqaralıq jámiyeti institutları hám basqada mámleketlik emes sektor wákilleriniń birgelikte islesiwin támiynlew, jánede bul tarawda xalıqaralıq birge islesiw ushın juwapker bolǵan mámleketlik organları haqqinda, sonday-aq, korrupciyaǵa qarsı gúresiw agentliginiń dúzilisi, waziypaları hám wákillikleri máseleleri dodalandı.
Jıynalıs sońında Yuridika fakulteti studentleri: D.Tursınbaeva, J.Turdımuratov hàm A.Arzımuratovlar dodalanǵan máseleler boyinsha prezentaciyalar tayarlap keldi. Dóńgelek stol jıynalısı miymanlar hám qatnasıwshılar ortasında óz-ara sáwbet hám pikir almasıwlar menen sonday-aq, óz-ara soraw-juwaplar menen qızǵın dawam etti. Jıynalıs sońında klub aǵzaları tárepinen tayarlanǵan “Jaslar korrupciyaǵa qarsı” atamasındaǵı tarqatpa materiyallar qatnasıwshılarǵa ulestirildi.
Diana Tursınbaeva
QMU, Yuridika fakulteti 2-kurs studenti
