Berdaq atındaǵı Qaraqalpaq mámleketlik universitetiniń Mádeniyat sarayında usı jıldıń 14-mart kúni Yuridika fakultetiniń 2-kurs studentleri arasında Jınayat huqıqı páni oqıtıwshısı, docent S.SH.Utemuratovanıń basshılıǵında shólkemlestirilgen “Jınayat huqıqı bilimdanları” tańlawı bolıp ótti.
Bul tańlaw óz gezeginde student jaslardıń Jınayat huqıqı páni boyınsha alǵan bilimleri, kónlikpeleri, sonday-aq, mámleketimizde jınayat nızamshılıǵı tarawında ámelge asırılıp atırǵan reformalardan qanshelli dárejede xabardar ekenligin sınaqtan ótkeriwdi óz aldına maqset etip alǵan.
Tańlawǵa Yuridika fakultetiniń 2-kurs studentlerinen dúzilgen “Yusticiya”, “Antikriminal”, “Ádillik ústinleri”, “Jas yuristler”, “Jas prokurorlar”, “Femida”, “Huqıqtanıwshılar”, “Ádalat”, “Siyasatshılar” komandaları qatnastı.
Tańlaw 4 shárt boyınsha ótkerildi. Birinshi “Sálemnama” shárti bolıp,bunda qatnasıwshılar óz komandaların tanıstırıp ótiwi,sonday-aq, prezentaciya arqalı Ózbekstan Respublikasınıń jańa redakciyada qabılanajaq hám dodalawda turǵan Jınayat kodeksine kirgizilip atırǵan jańa ózgerisler hám jańalıqlar haqqında, ámeldegi Jınayat kodeksi normaları menen salıstırıw arqalı mashqalalı táreplerin anıqlaw hám usınıslar beriwden ibarat edi.
Ekinshi “Krassvord” shárti bolıp, bunda Jınayat huqıqı páninen dúzilgen sorawlarǵa krassvort tárzinde juwap tabıw tiyis.
Úshinshi shárt Kazus sheshiwden ibarat bolıp ,aldın ala berilgen kazuslarǵa jınayıy-huqıqıy sıpatlama beriw hám jınayat waqıyasın durıs kvalifikaciyalawdan ibarat.
Sońǵı 4- “Blic” soraw-juwap shárti bolıp, bunda komandalar berilgen sorawlarǵa tez hám anıq juwap beriw wazıypası qoyıldı.
Tańlaw juwmaǵı boyınsha 1-orındı “Antikriminal” komandası, 2-orındı “Jas yuristler” komandası 3-orındı “Ádillik ústinleri” komandası iyeledi hám túrli nominaciyalar boyınsha jeńimpazlar anıqlandı. Qatnasıwshılar diplom hám qımbat bahalı sawǵalar menen sıylıqlandı.
Bul tańlaw student jaslardıń Jınayat huqıqı boyınsha alǵan bilimlerin jánede bekkemlep,nızamshılıq tarawı boyınsha kónlikpelerin jánede bayıttı.
Yuridika fakultetti Yurisprudenciya qánigeligi
3-kurs studenti Inaeva Húrziya
