Xalqımız arasında bir-birewge járdem qolın sozıw, sociallıq jaqtan qollap-quwatlawǵa mútáj adamlarǵa járdem beriw sıyaqlı insanıylıq pazıyletler ázelden saqlanıp kelinbekte. Búgingi kúnde pandemiya jaǵdayında da xalqımız arasında materiallıq jaqtan jaǵdayı tómenirek, baǵıwshısın joǵaltqan, dárámatı kúndelikli azıq-awqatınan artpaytuǵın shańaraqlar aramızda joq emes. Usınday qıyın jaǵdayda olarǵa járdem qolın sozıw adamgershiliktiń eń joqarǵı pazıyletleriniń biri.
Jaqında ǵana universitet Jaslar awqamı jetekshisi Dáwran Abadanov hám birqatar belsendi student jaslardıń baslaması menen sociallıq qorǵawǵa mútáj shańaraqlardıń birine járdem kórsetiw maqsetinde qayırqomlıq akciyası ótkerildi. Akciya sheńberinde Nókis qalasındaǵı shańaraqlardıń birine jaqınnan járdem kórsetildi. Ilajda bir topar student jaslar úy aldı átirapın kókelemzarlastırıw, jaydiń sırtın aqlaw, úy mebellerin ońlaw jumısların ámelge asırdı.
Shın kewilden islengen miynet iygilikli nátiyje beredi. Bunday qayırqomlıq ilaj hárbir insannıń kewilin kótereri sózsiz. Waqıt ótiwden toqtamaydı, hárbir insannıń izinde jaqsı sózi, ámelge asırǵan iygilikli isleri máńgi qaladı. Usınday jumıslardı jámlesken halda alıp barǵan akciya qatnasıwshıları hám shólkemlestiriwshilerine minnetdarshılıq bildiremiz. Sonıń menen birge, universitetimiz studentlerin usınday qayırqomlıq akciyalarına ele de belsendi qatnasıwǵa shaqırıp qalamız.
Turdıbek Naurızbaev
Qaraqalpaq filologiyası hám jurnalistika
fakulteti 3-kurs studenti.
