Universitetimiz Hayal-qızlar keñesi baslaması menen, 4 hàm 5-sanlı Studentler ùyinde «Aspazlıq sırları» dògeregi hàm oqıw kursı is basladı.
Berdaq atındaģı Qaraqalpaq màmleketlik universiteti Hayal-qızlar keñesi janında student qızlar ushın «Aspazlıq sırları» biypul oqıw kursı ashılıp, student qızlardı ùlken quwanıshqa bòledi. Dògerektiñ ashılıw keshesine universitet Hayal-qızlar keñesi baslıģı I.Seytnazarova, keñes janındaģı «Qızlarjan» klubı jetekshisi R. Qalımbetova, pedagog tàrbiyashı N. Eshjanova, A.Awezova, fakultet Hayal-qızlar keñesi jetekshileri hàm student qızlar qatnastı.
Bul dògerektiñ hàm de oqıw kursınıñ tiykarģı maqseti student qızlardıñ oqıwdan bos waqıtların mazmunlı shòlkemlestiriw, sonıñ menen birge qızlardı shañaraqqa, keleshek turmısqa tayarlawdan ibarat bolıp tabıladı. Sebebi, hàrbir qız bala bul erteñgi bolajaq kelin, ana, ùy biykesi hàm perzent tàrbiyashısı. Sonlıqtan da, xalqımız arasında » Ònerli qız xor bolmas» degeñ danalıq sòz biykarģa aytılmaģan.
Bul dògerek hàm oqıw kursına student qızlarımız benen birge universitet 4-5-sanlı Studentler turar ùyi janında jaqın jaylasqan «Qurılısshı» MPJdaģı ùyinde otırģan bànt bolmaģan qız-kelinsheklerimizdi de qamtıp alıw rejelestirilgen.
«Aspazlıq sırları» dògeregine universitettiñ Ekonomika fakulteti 2-kurs studenti Malika Joldasbaeva jetekshi etip bekitildi.
Hàzirdiñ òzinde-aq, klubqa 100den aslam qızlar aģza bolıp, aspazlıqtıñ àlwan tùrli sırların ùyreniwge bel bayladı.
Jaqında, dògerekte student qızlarģa aspazlıq sırların ùyretiw ushın dàslepki sabaq bolıp òtti. Sabaq barısında dògerek jetekshisi M.Joldasova Oraza ayında kùsh-quwat beriwshi mazalı taģamlardı hàm pizza pisiriwdi ùyretip, onı «Oraza menyusı» dep ataģanlıģı kòzdi quwandıratuģınday jaģday boldı. Sebebi, Oraza tutqan adamlardı òz qolımız benen pisirgen taģamlar menen sıylasaq yaki alıp barsaq tòbesi kòkke jetip qaladı desek asıra aytqan bolmaymız. Bul dògerekte tek ģana aspazlıq sırların ùyrenip qalmastan, azadalıqtı, tàrtiplilikti, sabırlılıqtı ùyrenip, òzimizdi òmirge tayarlap, hàr tàrepleme jetilistirip baramız. Student qızlar ushın ashılģan bul oqıw kurstiñ birinshi sabaģına Universitet Hayal-qızlar keñesi baslıģı I. Seytnazarova qatnastı. Olardı dògerek hàm oqıw kurstıñ ashılıwı menen qutlıqlap, dògerek islerine tabıslar tiledi.
