Dúnyada hár bir insannıń óz ornı, atqaratuǵın wazıypası boladı. Bul ómirde hesh bir nárse sebepsiz bolmaydı. Ómirimizde ushıratqan hár bir insan bizler ushın qandayda bir ómirlik bilim-kónlikpe úyretip ketiwi múmkin. Bizler ushın sonday qádirli bolǵan insanlardiń biri, ulli ustazımız Alimbetov Yusupbay aǵani eslep ótiw ̶ biz shákirtlerine hám qarız, hám parız.
Berdaq atındaǵı Qaraqalpaq mámleketlik universiteti Sociallıq pánler kafedrası docenti, filosofiya ilimleri kandidatı, belgili filosof alım Alimbetov Yusupbay aǵa jámiyette, ilim hám bilimlendiriw tarawında óziniń salmaqlı ornına iye belgili ustaz, adamlar arasında úlken húrmetge iye insan edi.
Ol 1946-jılı Shımbay rayonında tuwılǵan. 1968-jılı Qazaq mámleketlik universitetin pitkergen. 1968-jıldan Qaraqalpaq mámleketlik pedagogikalıq institutında, keyin ala onıń universitetke aylanıwı menen Qaraqalpaq mámleketlik universiteti dúzilgen waqıttan baslap assistent, úlken oqıtıwshı, docent lawazımlarında jumıs islegen.
1973-1977-jıllarda burınǵı Awqam Ilimler Akademiyası Filosofiya institutınıń aspiranturasında tálim aldı. “Turmis obrazında milliylik hám ulıwma insaniylıqtıń óz-ara tásiri” temasında ilimiy jumısın qorǵap, filosofiya ilimleriniń kandidatı ilimiy dárejesine iye boldı.
Ustaz Y.Alimbetov universitet kóleminde filosofiya, milliy gárezsizlik ideyası, filosofiya qánigeliginde filosofiyanıń ulıwma teoriyalıq máseleleri (ontologiya, gnoseologiya, rawajlanıw koncepciyası) qádiriyatlar filosofiyası, sociallıq filosofiya, filosofiyada adam probleması hám basqa da pánlerden studentlerge bilim berdi.
Ádiwli ustazımız ómiri dawamında ilimiy, ilimiy-pedagogikalıq jumıslar jazıw hám olardı baspadan shıǵarıw menen shuǵıllanıp keldi. Y.Alimbetovtan bizge “Mádeniyat”, “Turmıs obrazı”, “Jámiyettiń ruwxıy turmısı”, “Sociallıq filosofiya jámiyetti biliwdiń teoriyası hám metodologiyası”, “Milliy ideyanıń ulıwma insanıy principleri”, “Jámiyet sistema sipatında”, “Ontologiyalıq kompleks” atlı oqıw-metodikalıq qollanbalar, ilimiy maqalalar hám tezisler miyras bolıp qaldı.
Onıń ilimiy jumislarınıń ishinde qaraqalpaq xalqı folklorı, jazba ádebiyatı hám sociallıq-filosofiyalıq miynetleri keńnen belgili bolıp esaplanadı.
Ustazımız pedagogikalıq hám ilimiy iskerlik penen birgelikte, sheber kórkem ádebiy dóretiwshi insan sipatinda da shıǵarmalar dóretti, respublikalıq gazeta hám jurnallarda óziniń gurriń hám povestleri menen keńnen tanıldı. Jazıwshı sıpatında onıń “Perzenttiń ájeli” romanı, “Jolda”, “Júrekte qalǵan iz” gurrińler jıynaǵı baspadan shıqqan .
Alimbetov Yusupbay aǵa bizlerge sabaq beriw processinde hár bir studenttiń pikirin dıqqat penen tińlaytuǵın edi, sebebi, “Hárdayım adamlardı tıńlaw kerek, házirgi waqıtta adamlar bir-birin esitpeydi, tińlamaydi, sońiń nátiyjesinde túrli túsinbewshilikler, kelispewshilik jaǵdaylar kelip shıqpaqta”, – dep aytatuǵın edi. Sabaqlar waqtınan tısqarı da , asıǵıp turǵan bolsa da, úyrenemen, biliwdi qáleymen degen studentti húrmet qılıp, onı tińlaytuǵin, keńes hám jol-joba beretuǵın edi. Sebebi, sonsha bilim alǵan shákirtinen jańa pikirler, ideyalar shıǵatuǵınlıǵına isenim bildirer edi. Ustazımızdıń aytıwınsha, usınday belgili pedagog bolıwında eń dáslep mektepte oqıtqan muǵallimleri sebepshi bolǵanlıǵın, olarǵa háwes etip, ullı kásip oqıtıwshılıqtı tańlaǵanıń aytıp ótken edi.
Alimbetov Yusupbay aǵa 74 jıllıq ómiri dawamında óziniń keńpeyilligi, adamgershiligi, keń dúnyaqaras hám sawatlılıǵı menen bizge órnek bola alatuǵınday insan sıpatında yadımızda qaldı. Bul ustaz qaraqalpaq xalqınıń gáwhar taslarınıń biri edi. Y.Alimbetov qaldirǵan ilimiy miynetler, kórkem ádebiy shıǵarmalar, aǵla insanıy pazıyletler biz student jaslar yadında mángi saqlanıp qaladı.
Xojametova Jadıra,
Qaraqalpaq mámleketlik universiteti
Tariyx fakulteti Filosofiya qánigeligi 3-kurs studenti.
