(Ádiwli ustaz Joldasbay Mırzanov haqqínda)
Eslew hám qádirlew insan ruwhıy dúnyasınıń ázelden ajıralmas bólegi bolıp kelgen. Qálbi mehir-muhabbatqa tolı insanlarǵana óz tariyxın, ata-babaların, ustazların hárdayım esleydi hám jarqın keleshek jolında miynet etip atırǵan insanlardıń qádirine jetedi.
Biz qaysı xalıqtan ekenligimiz yáki milletimizge qaramastan tariyxiy eslew menen barmız. Ásirese, dúnyadan ótkenlerdiń jaqsı ámellerin eske alıw, qádirlew, xalqı ushın islegen miynetlerin qásterlew xalqımızǵa tán bolǵan joqarı pazıyletlerden sanaladı. Ómiri dawamında islegen miynetleri, erisken nátiyjeleri, jámiyette tutqan ornı hám basqalarǵa órnek bolatuǵınday pazıyletleri menen xalqımızdıń yadında qalǵan ullı ustazlarımızdı eslew hár birimizdiń kewlimizde maqtanısh sezimlerin oyatadı. Ómir jolın ósip kiyatırǵan jas áwladqa órnek etip kórsete alatuǵın insanlar haqqında sóz barar eken, usı orında qaraqalpaq xalqınıń ilim-pán tarawı rawajı ushın ayrıqsha úles qosqan ustazlarımızdan biri, fizika-matematika ilimleri kandidatı, docent Mırzanov Joldasbay Esbergenovich aramızda bolǵanında, bıyıl 65 jaska shıqqan bolar edi.
Joldasbay Mırzanov 1956-jılı Nókis qalasında muǵallim shańaraǵında tuwıldı. 1972-jılı Nókis qalasındaǵı Berdaq atındaǵı orta mektepti pitkerip, Qaraqalpaq mámleketlik pedagogikalıq institutınıń fizika-matematika fakultetine oqıwǵa túsedi, al 1974-jılı ayrıqsha úlgeriwshi studentler qatarında oqıwın dawam ettiriw ushın Tashkent mámleketlik universitetine jiberilip, onı 1978-jılı tabıslı pitkerdi. Ol óziniń miynet jolın 1978-jılı Nókis mámleketlik universitetiniń «Matematikalıq analiz» kafedrasında assistentlik lawazımında jumıs islewdi baslap, ómiriniń aqırına deyin usı kafedrada aǵa(úlken) oqıtıwshı, docent bolıp isledi. 1984-jılı Kiev qalasında aspiranturada oqıwın dawam ettirip, onı 1987-jılda waqtınan burın dissertaciya jaqlaw menen tamamladı.
Joldasbay Mırzanov óziniń jemisli miynet jolı dawamında matematika fakulteti dekanı orınbasarı, matematikalıq analiz kafedrası baslıǵı lawazımlarında jumıs alıp bardı.
Joqarı adamgershilik pazıyleti bul insannıń tanımalı tárepi boldı desek asıra aytqan bolmaymız. Auditoriyada yamasa sol dáwirlerge tán bolǵan paxta dalalarında bolsın, Joldas aǵa studentlerge óziniń tájiriybelerinen kelip shıǵıp bilim hám tárbiya beriwden sharshamas, al lekciyalardı oqıwı, ámeliy sabaqlardı alıp barıwı bolsa onıń sheber pedagog ekenligin bildirip turar edi. Házirge shekem bizler jeke iskerligimizde Joldas aǵadan úyrengenlerimizdi qollanıp kelemiz. Onıń jáne bir úlgili tárepi, ol jámiyetlik jumıslar, ásirese mádeniy ilajlarǵa belsene qatnasıp keldi. Milliy shapan kiyip, qaraqalpaqtıń alamoynaq duwtarın shertip shıqqan waqıtları, bul insannıń kópqırlı talantına, qızıǵıwshılıǵına háwesimiz keletuǵın edi.
Joldas aǵanıń ómiri júdá qısqa boldı, sum ájel onı 40 jasında alıp ketti. Biraq, jaqsıdan baǵ qalǵanı sıyaqlı, ol adamnıń izinde ólmes ilimiy isleri, islerin dawam ettiriwshi shákirtleri, tárbiyalı etip ósirgen perzentleri qaldı. Úlken ulı Berdaq Mırzanov (ekonomika boyınsha filosofiya doktorı) ata jolınan barıp, ilim jolında pidakerlik penen miynet etip atır.
Húrmetli ustaz, qádirdan aǵa, miyirman áke Joldasbay Mırzanovtıń basıp ótken ullı jolı, tálim sistemasın rawajlandırıwǵa qosqan úlken úlesi búgingi kúnniń jasları ushın bilim hám tárbiya mektebi wazıypasın atqaradı.
Buxarbay Kurbanov
Matematika fakulteti matematikalıq analiz kafedrası baslıǵı.
