Hár jılı Joqarı oqıw orınlarında bilim alıp atırǵan hám xızmet kórsetip atırǵan jaslar arasında ótkeriliwi dástúrge aylanǵan «Ilhom» sıylıǵı respublikalıq tańlawınıń jeńimpazları anıqlandı.

Quwanıshlısı, jeńimpazlar ishinde Berdaq atındaǵı Qaraqalpaq mámleketlik universiteti doktorantı da bar.Universitettiń qaraqalpaq ádebiyati kafedrasınıń tayanısh doktorantı Malika Palımbetova ózinıń tınımsız miynetleri nátiyjesine tańlawda  sıylı III orındı iyeledi hám 15 mln.swm muǵdarındaǵı aqshalay sıylıq xoshametlendi.

Bul tańlawǵa tiykarınan dóretiwshi, ádebiyatqa ıqlas qoyǵan, ilim-izertlew jumıslarına qızıǵıwshı jaslar qamtıp alınǵan.

Tańlawdı ótkeriwden gózlengen tiykarǵı maqset – shayır hám jazıwshılardıń ómiri,dóretiwshiligi,shıǵarmalarınıń janrlıq ózgeshelikleri, ádebiy shıǵarmalardı awdarmalaw hám sol tiykarda ilimiy izertlewler alıp barıw,kino hám sahna ushın shıǵarmalar dóretiw,ilimiy-dóretiwshilik jumıslarda jaqsı nátiyjelerge erisip kiyatırǵan jaslardı izlep tabıw hám qollap-quwatlawdan ibarat.

«Ilham» sıylıǵı respublikalıq tańlawınıń bul jılǵı jeńimpazların sıylıqlaw máresemi 20-may kúni Jazıwshılar qıyabanında bolıp ótti. «Úlken ádebiyat bayramı hápteligi» sheńberinde ótkerilgen ilajda jeńimpazlar qımbat bahalı sawǵalar hám húrmet jarlıqları menen sıylıqlandı.

 Z. JUMANOV,

QMU. Qaraqalpaq filologiyası hám jurnalistika fakulteti