Usı jıldıń 29-oktyabr kúni universitetimizdiń Mádeniyat sarayında shet tiller fakulteti student jaslarınıń arasında úgit-násiyat jumısları alıp barıldı. Bul ilajdı shet tiller fakulteti dekanı Dj.Qurbanbaev óz sózi menen ashıp berip, studentlerge universitettiń ishki tártip-qaǵıydaları haqqında tolıq túsinik berdi. Buǵan qosımsha jaslar menen islesiw boyınsha dekan orınbasarı T.Kulniyazov, fakultettiń hayal-qızlar keńesi baslıǵı M.Ametovalar shıǵıp só ylep, student qızlardın kiyiniw mádeniyatına ayrıqsha toqtalıp ótti.
Ilaj dawamında Nókis qalası 3-sanlı IIB profilaktika inspektorları A.Toreniyazov hám A.Oralbaevlar sózge shıǵıp, student jaslardıń arasında jınayatshılıqtıń aldın alıw hám huqıqbuzarlıqlardın júz bermewi ushın islenip atırǵan isler haqqında ayttı hámde ótken jıllarda bolǵan nızam buzıwshılıq jaǵdaylarınıń aqıbetlerin aytıp, studentlerdi bunday islerden awlaq júriwge shaqırdı.
Házirgi kúnde studentler arasında alıs aymaqlardan kelip, ijarada jasap atırǵan student jaslar kópshilikti quraydı. Qalaberdi, hawa-rayının suwıtıwına baylanıslı gúz-qıs aylarında ısıtıwshı úskeneler keńinen paydalanılıp baslandı. Ókinishke oray, ısıtıw qurallarınan nadurıs paydalanıw yáki olardı qarawsız qaldırıw aqıbetinde birqansha kewilsiz jaǵdaylar bolıp atırǵanıda sır emes. Mine usınday jaǵdaylardıń aldın alıw maqsetinde Nókis qalası ayrıqsha jaǵdaylar bólimi qánigeleri Z.Vaysov hám P.Qurbanovlar studentlerge iyis gázinen záharleniwdiń aldın alıw hám órt qáwipsizligi qagıydaları haqqında túsinik berip, usı qaǵıydalarǵa tolıq ámel etiw kerek ekenligin eskertti.
Ushırasıw juwmaǵında studentler ózlerin qızıqtırǵan sorawlarǵa juwap alıp, kórilgen máseleler boyınsha óz pikirleri menen bólisti hám túsinik jumısların alıp barǵan miymanlarǵa minnetdarshılıq bildirdi.
Shet tiller fakulteti 2-kurs studenti N.Kokanova
