Házirgi waqıtta Qaraqalpaq mámleketlik universitetiniń Matematika bakalavr tálim baǵdarınıń pitkeriwshi 4-kurs studentleri oqıw joba tiykarında akademiyalıq licey hám ulıwma orta bilim beriw mekteplerinde pedagogikalıq ámeliyat ótep atır. Bul tálim baǵdarında jámi 41 pitkeriwshi kurs studentleri bar bolıp, olar universitet rektorınıń «Pedagogikalıq ámeliyatqa jiberiw» haqqındaǵı 1053 S/5-sanlı buyrıǵı tiykarında QMU janındaǵı 1-sanlı akademiyalıq liceyi, Nókis qalalıq hám de taǵı basqa da qońsılas rayonlarda pedagogikalıq ámeliyat ótew ushın Xalıq bilimlendiriw bólimine qaraslı ulıwma orta bilim beriw mekteplerine bólistirilgen. Olardıń pedagogikalıq ámeliyatına basshılıq etiw ushın juwapker metodistler etip, «Matematikalıq analiz» kafedrasınıń professor-oqıtıwshıları bekitilgen.
Matematikalıq analiz kafedrası tárepinen ámeliyatshılardıń pedagogikalıq ámeliyatı ushın arnawlı baǵdarlama islep shıǵılǵan bolıp, onda studentlerdiń ámeliyat barısında isleytuǵın jumısları, wazıypaları, ámeliyat dawamında júritiliwi tiyis bolǵan hújjetler hám olardı qadaǵalaw kriteriyaları keltirilgen.
Studentlerge pedagogikalıq ámeliyattı ótew dáwirinde jańa janlı pedagogikalıq bilimlerdi iyelew, tálim beriw processinde oqıwshılar menen qanday islesiw kerek ekenligi haqqındaǵı kónlikpelerin iyelew qanshelli zárúrli ekenligi bekitilgen metodistler tárepinen ayrıqsha atap ótildi. Studentler bunıń zárúrli wazıypa ekenligin tereń seze otırıp, házirgi waqıtta pedagogikalıq ámeliyatqa aktiv qatnasıp kiyatir. Ámeliyat dáwiri sonısı menen de áhmiyetli, ámeliyat dáwiri studentlerde tek ǵana bilimlerdi bekkemlew emes, bálki óz kásibine súyispenshilik sezimin de qáliplestiredi, sol tárepten de ámeliyat zárúrli esaplanadı.
Ámeliyatshılardıń orınlardaǵı jańa pedagogikalıq texnologiyalar menen islewshi joqarı mamanlıqqa hám tájiriybege iye pedagoglardıń is usılların úyreniwi, olar menen usı baǵdarda pikir alısıwı bolajaq qánigeler ushın baslı sabaq bolıp esaplanadı. Bul dáwirde ámeliyatshı pánge hám qánigelikke tayarlaw dawamında alǵan teoriyalıq bilimlerin ámelde bekkemleydi, jańa bilim hám kónlikpelerdi iyeleydi, pedagogikalıq sheberlik qáliplesedi.
Ámeliyatshılar orınlarda ózlerine bekitilgen pedagoglar menen birgelikte praktika sabaqların ótip, ózlerine zárúrli tájiriybelerdi toplap atır.
