Búgin,25-noyabr kúni Berdaq atındaǵı Qaraqalpaq mámleketlik universitetinde Gubkin atındaǵı Neft hám gaz Rossiya mámleketlik universiteti professorı, joǵarı oqıw orınlarına tayarlaw oqıw ilimiy orayı dekanı, professor B.G.Pirojkov miymanda boldı. Miymandı universitet rektorı, professor Axmed Reymov jıllı júzlilik penen qabıllap, Qaraqalpaqstan jaslarınıñ keleshegi ushın áhemiyetli bolǵan ullı rejeler barısında pikir alıstı.

Ushırasıwǵa Gubkin atındaǵı Neft hám gaz Rossiya mámleketlik universiteti professorı B.G.Pirojkov hám usı universitettiñ Tashkent filialı direktorı Abdulla Magrupov qatnastı.

Ushırasıw barısında 2021-2022-oqıw jılında Qaraqalpaq mámleketlik universiteti bazasında mektep pitkeriwshilerden Gubkin atındaǵı Neft hám gaz Rossiya mámleketlik universitetine oqıwdı qálewshi jaslardı biypul tayarlaw kursın jolǵa qoyıwdı shólkemlestiriwdi kelisip aldı. Bul tayarlıq kursları jıl dawamında alıp barıladı.

Qaraqalpaq mámleketlik universitetinde bolıp ótken búgingi áhemiyetli ushırasıw qaraqalpaqstanlı jaslarımızdıñ keleshegi ushın jáne bir imkaniyat jaratıp bermekte.

Qaraqalpaq mámleketlik universiteti Baspasóz xızmeti.