Bùgin, 25-noyabr kùni Latviya mámleketiniń Málimleme sistemaların basqarıw universiteti (ISMA) 1–Prezidenti Roman Dyakon hám Ferǵana wálayatı Málimleme sistemaların basqarıw universiteti filialı Prezidenti Sandra Plota Berdaq atındaǵı Qaraqalpaq mámleketlik universitetine keldi.

Miymanlardı universitet rektorı А.Reymov, oqıw isleri boyınsha prorektorı O.Duysenbaev, ilimiy hám innovatsiyalıq isler boyınsha prorektorı I.Turdımambetov hám Xalıqaralıq birge islesiw bólimi baslıgʼı Sh.Shaniyazovlar kùtip aldı.

Ushırasıw barısında Qaraqalpaq mámleketlik universiteti rektorı, professor А.Reymov oqıw dárgayımızdıń bùgingi kùndegi jetiskenlikleri hám turmısı haqqında miymanlarǵa keń maǵlıwmat berip ótti.

Keleshekte eki joqarı oqıw orınları arasında birge islesiw boyınsha sáwbetlesiw alıp barıldı. Bunda professor oqıtıwshılardı tájiriybe almasıwı, stajirovka kursların ámelge asırıw, studentlerdiń akademik almasıwın jolǵa qoyıw, ilimiy izertlew jumısların birgelikte alıp barıw bagʼdarlarında pikir alıstı.

Qaraqalpaq mámleketlik universiteti turmısı miymanlar da jaqsı tásir qaldırıp, keleshekte birge islesiw baǵdarları boyınsha unamlı kózqarasın bildirip ótti.

Qaraqalpaq mámleketlik universiteti Baspa sóz xızmeti