“Meniń Prezidentim” dóretiwshilik tańlawı qatnasıwshılarınıń yadında qalatuǵın bul ushırasıw usı oqıw ornında oqıwǵa degen ıqlasın arttırsa tájip emes.
Ózbekstan Respublikası Xalıq bilimlendiriw ministrligi hám Ózbekstan Kásiplik awqamı Federaciyasınıń qospa qararı menen tastıyıqlanǵan Nızam tiykarında ótkerilgen «Meniń Prezidentim» dóretiwshilik tańlawınıń Qaraqalpaqstan Respublikası basqıshı usı jıldıń 17-dekabr kúni Qaraqalpaq mámleketlik universitetinde bolıp ótti.
Universitet rektorı A.Reymov respublikalıq basqıshqa jetip kelgen qábiletli mektep oqıwshıları menen ushırasıp, keleshek jaslarımızǵa jaratılıp atırǵan imkaniyatlar haqqında aytıp ótti. Dóretiwshi jaslarımız ushın úlken qollap-quwatlaw bolatuǵın bunday tańlawdıń áhmiyetin joqarı bahalap, oqıwshı-jaslarımızdıń bilim iyelewdey ullı maqset jolındaǵı umtılıslarına áwmet tiledi.
«Meniń Prezidentim» dóretiwshilik tańlawınıń Qaraqalpaqstan Respublikası basqıshında sıylı 1-orındı Bozatawlı Gúlferuz Sarıbaeva iyelep, kelesi basqıshqa jollama aldı.
“Meniń Prezidentim” degen bir awız sózi júreginen shıqqan bul mektep oqıwshılarınıń talantı hám bilimi bizdi quwandıradı hám olarǵa tabıslar tileymiz.
QMU Baspasóz xızmeti
