Búgin, Ózbekstan hàm Qaraqalpaqstan xalıq bilimlendiriw aģlası, «Doslıq» ordeni iyesi, shayır, jurnalist hàm jàmiyetlik isker Gulnara Nurlepesova menen ushırasıw ótkerildi.

Yuridika fakulteti, Yurisprudenciya, Milliy ideya, ruwqıylıq tiykarları hàm huqıq tàlim baģdarı 3-kurs studentleri usınısları boyınsha 40 jıldan aslam nàtiyjeli miynet jolına iye, jàmiyetlik isker, shayır hàm jurnalist Ózbekstan hàm Qaraqalpaqstan Jazıwshılar awqamı aģzası, Ózbekstan hàm Qaraqalpaqstan xalıq bilimlendiriw aģlası, «Doslıq» ordeni iyesi Gulnara Nurlepesova menen ushırasıw bolıp ótti.

Ushırasıwdı Yuridika fakulteti dekan orınbasarı A.Reyimbaev kiris sóz benen ashıp, G. Nurlepesova haqqında qısqa maģlıwmat penen tanıstırdı.

 Soñınan, 301-topar studenti Jiyenbaeva Salima bul jàmiyetlik belsendi isker hàm dóretiwshi insan haqqında student jaslarģa keñirek maģlıwmat berip ótti.

Ruwxıy azıq hàm insanģa zawıq beriwshi ushırasıwda Gulnara Nurlepesova óziniñ ómir jolı haqqında sóz etip, studentler ushın turmıslıq tàjiriybelerinen kelip shıģıp bahalı màslàhatlerin berdi hàm janģa jaģımlı, àjayıp qosıqların oqıp berdi.

Ushırasıw juwmaģında, fakultet dekanatı tàrepinen tayarlanģan sawģalar tapsırıldı. Estelik ushın súwretke túsken studentler Gulnara Nurlepesovaģa minnetdarshılıģın bildirip, «…Mazmunlı, úlken bir àdebiy kitap oqıģanday boldıq» dep quwanıshın bildirdi.