2021-jıldıń 21-22-dekabr kúnleri Ózbekstan Respublikası Innovaciyalıq rawajlanıw ministrligi imaratında jaslardıń innovaciyalıq ideyaları hám startup joybarların ámelge asırıw, olardıń innovaciyalıq isbilermenlik kónlikpelerin rawajlandırıw maqsetinde Ózbekstan Respublikası Jaslar isleri agentligi, Bántlik hám miynet múnásábetleri ministrligi hám BMSH Rawajlandırıw Baǵdarlamasınıń “Ózbekstanda jaslar bántligine kómeklesiw” qospa joybarı sheńberinde “Jaslar keleshegimiz” fondı menen birge islesiwde “Startup baslamaları” tańlawınıń juwmaqlawshı basqıshı – “Demo day” (Prezentaciya kúni) hám Qaraqalpaqstan Respublikası, barlıq wálayatlardan kelip túsken eń jaqsı 40 startup joybarlarınıń kórgizbesi ótkerilmekte.
Kórgizbe dawamında eń jaqsı dep tabılǵan startup joybarlarınıń avtorları tárepinen tiyisli shólkemler hám isbilermenlerge óz joybarları, bazar kólemi hám joybardı ámelge asırıwı ushın zárúr bolǵan qarjı haqqında maǵlıwmatlar berilmekte.
Kórgizbede Qaraqalpaq mámleketlik universitetiniń student jasları da belsendi qatnaspaqta. “Qurılıs” fakulteti “Imarat hám inshaatlar qurılısı” qánigeligi 4-kurs studentleri Jumamuratov Begdiyar hám Maxambetaliev Arif-Xajiyler ózleriniń “ED CONNECT – mayıplar arbashası ushın tez hám ańsat biriktirilip sheshiletuǵın, uzaq aralıqlarǵa ańsat hám kóp energiya sarıp etpesten jetip barıw tirkemesin islep shıǵarıw” joybarı menen hámde “Ekonomika” fakulteti “Finans” qánigeligi 4-kurs student Narbaev Sultanbek óz toparı menen birgelikte ózleriniń “KORCHi – qarıydarlardı tartıw, ónimler hám biznes haqqında tolıq maǵlıwmatqa iye bolǵan platforma” joybarı menen qatnastı hám jeńimpaz dep tabıldı hámde óz joybarların ámelge asırıw ushın hár bir joybar iyeleri 50 mln swm maqsetli grant qarjıların utıp aldı.
Ilimiy innovaciyalıq islenbelerdi kommerciyalastırıw bólimi
