Berdaq atındaģı Qaraqalpaq mámleketlik universiteti Fizika fakulteti «Jas energetikler» dógeregi 22-dekabr xalıqaralıq «Energetikler» kásiplik bayramı kúni múnásibeti menen «Kásibim-maqtanıshım» atlı tańlawın shólkemlestirdi.

Tańlawda tómendegi nominaciyalar boyınsha fakultettegi barlıq bakalavr tálim baģdarı studentleri qatnastı.

1.Eń jaqsı doklad

2.Eń jaqsı «Start up» ideya

3.Eń jaqsı maket.

Tańlawda student jaslardıń miynetlerin tarawdıń iri islep shıģarıw kárxanalarınan kelgen jetekshi qánigeler: Taqıyatas JES AJ kadrlar bólimi baslıģı S.Esemuratov, Uzenergoinspekciya QR aymaqlıq bólimi jetekshi injeneri Sh.Tursınbaev hám NUKUSELEKTROAPPARAT qospa kárxanası jetekshi injeneri J.Uzakbaevlar hámde fakultetimiz professor-oqıtıwshılarınan fizika-matematika ilimleri doktorı, professor Qanatbay Ismailov, Elektr energetikası kafedrası docenti Babajanov Yunus hám texnika ilimleri doktorı, professor Marat Tagaevlar ádil bahalap berdi.

Tańlaw juwmaģına kóre «Eñ jaqsı doklad» nominaciyası boyınsha 3A-elektr energetika toparı studenti Ergaraeva Urxiya, Eń jaqsı «Starst up» ideya nominaciyası boyınsha 3B-elektr energetika toparı studenti Elmurotov Alpamıs, «Eń jaqsı maket» nominaciyası boyınsha Energetika komandası jeńimpaz dep tabıldı. Jeńimpazlar shólkemlestiriwshiler tárepinen diplom hámde estelik sawģaları menen sıylıqlandı.

Bunnan tısqarı jıl dawamında student jaslarımızģa ilim, bilim berip kiyatırģan pidayı ustazlar, oqıwda, jámiyetlik jumıslarda beldendi student jaslar, energetika tarawın rawajlandırıw hámde tarawda studentlerdiń kásiplik mamanlıģın asırıw, bolajaq kadrlardıń zamanagóy bilimlerdi iyelewi ushın olarģa zárúr shar-sharayatlar jaratıw, joqarı oqıw orınlarında bilim sapasın asırıw, ilim-pán islep shıģarıw integraciasın jánede bekkemlew baģdarında iygilikli xızmetleri ushın kadrlar buyrıtpashıları qánigeleri de hùrmet jarlıģı hámde bahalı sawģalar menen sıylıqlandı.

Nargiza Abdullaeva

Fizika fakulteti studenti