Qısqı dem alısta studentlerdiń bos waqıtların mazmunlı hám qızıqlı etip ótkeriwde studentler arasında onlayn tańlawlar hám ilajlar ótkerilip atır. Mine usılar qatarında Qaraqalpaq mámleketlik universitetiniń Fizika fakulteti hayal-qızlar máseleleri boyınsha dekan másláhátshisi Gúlistan Nurımbetovanıń baslaması menen fakultetimizde student qızlar arasında «Milliyligimiz maqtanıshımız» atlı onlayn kórik tańlaw járiyalanǵan edi. Tańlaw shártlerine kóre student qızlarımız ózinde bar milliy kiyimlerin kiygen halda shayırdiń qosıq qatarlarınan, shıǵarmalardan úzindiler, monolog oqıp videorolik kórinisinde tańlawǵa jiberdi. Tańlaw múddeti 22-yanvar kúni juwmaqlanıp, «Milliy kiyimler» nominaciyasi boyınsha tańlaw jeńimpazları anıqlandı.  

I-orın Qaraqalpaq xalqımızdıń milliy kiyimi bolǵan qızıl kóylek hámde qızlarımızdıń naǵıslı beshpentin kiyip, milliy taǵınshaqlarımızdan bilezik, júzik hámde sırǵasın taǵıp I.Yusupovtıń «Ayt sen Ájiniyazdıń qosıqlarınan» qosq qatarlarınan úzindi oqıǵan qatnasıwshımız 3a1-fizika qániygeligi studenti Raxima Omarovaǵa nesiyp etti.

II-orınǵa Aytmuratova Ulbosın hám Narbaeva Nasibalar ılayıq dep tabıldı. Bul qatnasıwshılarımızda qaraqalpaq hám ózbek xalqınıń milliy kiyimleri menen tańlawǵa qatnastı.

Bunnan basqa da qazaq, túrkmen, qırǵız xalqınıń milliy kiyimlerin kiyip kórik tańlawǵa belsendi qatnasqan qızlarımızdan júdá minnetdar boldıq.

Tańlaw jeńimpazlarına;

 I –orın ushın 50 mıń som hám diplom sertifikatı,

II –  orın ushın  30 mıń somnan  hám diplom sertifikatı,

Qalǵan qatnasıwshılarımızǵa tańlawǵa belsendi qatnasqanlıǵı ushın 20 mıń somnan aqshalay pul sıylıqları inám etildi.

 Básekilerge bay bolǵan áne usınday tańlawlarımızǵa studentlerimizdi belsendi qatnasıwǵa shaqırıp qalamız!