Бүгин, 15-апрель күни Бердақ атындағы Қарақалпақ мәмлекетлик университети Тарийх факультетинде «Қубла Арал бойы тарийхы ҳәм археологиясы: изертлеўлер, излениўлер» Ѳзбекстан Қаҳарманы, археолог-алым Ғайратдин Хожаниязов оқыўлары атамасындағы илимий теориялық конференция болып ѳтти.

       Илимий теориялық конференцияны Қарақалпақ мәмлекетлик университетиниң ректоры, профессор Ахмед Реймов кирис сѳзи менен ашып берди.

 -Қарақалпақстан археологиясын жәҳәнге танытқан археолог-алым, Қарақалпақстан Республикасына хызмет көрсеткен илим ғайраткери Ғайратдин Хожаниязов археология илиминиң раўажланыўына өзиниң салмақлы үлесин қосқан илимпаз. Сонлықтан да ҳүрметли алымның  илимде жаратқан мектебин бүгинги жас әўладқа үлги етип кѳрсетиў, оның бул тараўда алып барған илимий мийнетлерин тереңнен үйрениў әҳмийетли ўазыйпалардың биринен саналады,- деп атап ѳтти университет ректоры.

          Илимий теориялық конференцияда Қарақалпақ мәмлекетлик университети оқытыўшысы М.Турсынуратов, Тарийх факультети «Археология» кафедрасы баслығы, т.и.к. доцент Ж.Ҳәкимниязов, «Археология» кафедрасы доценти, т.и.к М.Туребековлар өзлериниӊ баянатында археолог алымныӊ өмир жолы ҳәм илимий изленислери ҳаққында кеӊ түрде сөз етти.

           Қарақалпақ мәмлекетлик университети Тарийх факультети деканы, тарийх илимлериниң кандидаты, доцент С.Сулайманов , нураный устаз, т.и.к. доцент А.Утемисов, «Археология» кафедрасы доценти, т.и.к Ж.Айтмуратовлар шығып сөйлеп, Қарақалпақстан археологиясын дүнья жүзине танытқан кѳрнекли илимпаздың илимий изленислерине кеңнен тоқтап ѳтти.

    Археолог-алым Ғайратдин Хожаниязов ѳзиниң саналы ѳмирин Қарақалпақстанның тарийхый ҳәм мәдений мийрасларын, археологиялық естеликлерин изертлеўге арнаған илим ғайраткери еди.

          Археолог-алым Ғайратдин Хожаниязов оқыўлары атамасындағы илимий теориялық конференцияда қарақалпақ халқының азамат перзенти, әлпайымлылығы ҳәм илимдеги пидайылығы менен адамгершиликтиң үлкен үлгисин қалдырып кеткен инсанның мазмунға толы ѳмир жолы менен илимдеги изленислери сѳз етилди.  

       Усы күни илимий теориялық конференциядан соӊ Өзбекстан Қаҳарманы, профессор Ғайратдин Хожаниязов атындағы инновациялық оқыӯ аудиториясыныӊ ашылыӯ мәресими болды. Университет ректоры А.Реймов оқыӯ аудиториясы ашылыӯ мәресиминиӊ лентасын кесип, үлкен мақсетлер менен басланып атырған иске сәт тиледи.

Гулжахан ТАЖАДИНОВА. 

журналист