Berdaq atındaǵı Qaraqalpaq mámleketlik universitetiniń Tariyx fakulteti Arxeologiya tálim baǵdarınıń 2-kurs studentleri usı jıldıń 2-may sánesinen 14-may sánesi aralıǵında Sulayman Baqırǵanıy esteliginde arxeologiyalıq-etnografiyalıq qánigelik ámeliyatın ótkeriw maqsetinde Moynaq rayonına jetip keldi.

Moynaq rayonı aymaǵında pútkil túrkiy xalıqlar arasında Hákim ata laqabı menen belgili bolıp, Xoja Sulayman Baqırǵanıy maqbarası-teberik ziyaratxanası jaylasqan. Ol biziń ullı jerlesimiz, danıshpan, oyshıl hám talantlı shayırlardan biri bolǵan. Ámeliyattıń dáslepki kúninen Hákim ata Sulayman Baqirǵanıy kompleksin jaqsı niyetler menen ziyaratlawdan basladıq. Xákim ata – Sulayman Baqırǵaniydiń hikmetleri menen qosıqları xalqımızdıń mádeniy ǵáziynesi bolıp, onıń shıǵarmaları insandı tuwılǵan jerge bolǵan sadıqlıq, ómirlik joldasına opadarlıq, hadal miynet etiw, ilim-ónerdi úyreniwge baǵdarlaydı. Sulayman Baqırǵaniydiń kewil tazalıǵı,  miyrim-shápáátligi, qayır-saqawatlılıǵı, hújdanınıń pákligi, ata-babalar miyrasın qásterlewi haqqındaǵı oyları búgingi kúnimiz ushın oǵada áhmiyetli bolıp tabıladı. Xákim ata –Sulayman Baqırǵaniydiń ájayıp miyraslarınıń toǵız ásirge shamalas waqıttan berli óziniń qunın joǵaltpay, xalqımız tárepinen qásterlep saqlanıp kiyatırǵanlıǵınıń da sırı mine usıdan bolsa kerek.

Biz ámeliyatımız dawamında doslarımız benen birge ustazlarımızdan Hákim ata Sulayman Baqirǵanıy haqqında kóplegen maǵlıwmatlarǵa iye boldıq. Ámeliyatqa Arxeologiya kafedrası baslıǵı, docent J.Hakimniyazov hám assistent M.Tolıbaevlar basshılıq etpekte. Álbette, bul ámeliyatımız da úlken jańalıqlarǵa tolı boladı, – degen jaqsı niyettemiz!

D.Jumabaev, T.Kamalova

Arxeologiya tálim baǵdarı 2-kurs studentleri