Keń jámiyetshilikke belgili ádebiyatshı, sınshı, ádebiyat teoriyası boyınsha bir qatar miynetlerdiń avtorı, filologiya ilimleriniń doktorı, professor Quwanıshbay Orazımbetov bıyıl 60 jastı qarsı almaqta. Ilimpazdıń yubiley toyı respublikamızdıń barlıq orınlarında joqarı ruwxta, saltanatlı túrde belgilenip atır. Usı jıldıń 6-may sánesinde ádebiyatshı alımnıń tuwılıp kámalǵa kelgen rayonı– Qaraózek hám Taxtakópir rayonlarında yubiley jası keń túrde belgilendi.
Qaraózek rayonı Mádeniyat úyinde rayon hákimligi, ilimpazdıń nuranıy oqıtıwshıları, klasslas dosları onı úlken saǵınısh hám húrmet penen kútip aldı. Mádeniyat úyinde shólkemlestirilgen ushırasıwdı universitettiń Qaraqalpaq filologiyası hám jurnalistika fakulteti dekanı, docent Q.Turdıbaev kiris sóz benen ashtı hám alıp bardı. Ushırasıwda Qaraqalpaqstan Jazıwshılar awqamı baslıǵı K.Karimov, «Bilim» baspası baslıǵı, jazıwshı M.Nızanov, shayır B.Genjemuratovlar shıǵıp sóylep, ádebiyatshı alımnıń ilim jolındaǵı mashaqatlı miynetleri, ilimge pidayılıǵı, qaraqalpaq ádebiyatı hám sınındaǵı mártlikleri haqqında aytıp ótti. Ilimpazǵa mektep dárgayında sabaq bergen nuranıy ustazları, birge tálim alǵan klasslas dosları alımnıń mektep oqıwshısı dáwirindegi jaslıǵın eske alıp, onıń jetik ilimpaz bolıp jetilisiwinde jaslıqtaǵı talapshańlıǵı, kitapqumarlıǵı, shaqqanlıq pazıyletleriniń sebep bolǵanlıǵın jıynalǵan jaslar hám mektep oqıwshılarına ibrat sıpatında aytıp berdi. Ushırasıwdıń ekinshi bóliminde rayon mádeniyat úyi xızmetkerleri tárepinen tayarlanǵan koncert baǵdarlaması qoyıp berildi.
Sonday-aq kúnniń ekinshi yarımında jıynalǵan topar Taxtakópir rayonında miymanda boldı. Rayon turǵınları zamanagóy kórinistegi mádeniyat úyinde miymanlardı joqarı saltanat penen kútip aldı. Ilajda ádebiyatshı ilimpazdıń ilimiy iskerligi haqqında bayanatlar tıńlandı. Universitet dárgayında ustazlıq etken shákirtleri tereń súyispenshilik penen alımnıń insanıylıq pazıyletlerin tilge alıp, ózleriniń búgingi kúndegi jetiskenliklerinde ustaz-ilimpazdıń úlesi ayrıqsha ekenligin maqtanısh etti. Ilaj sońında koncert baǵdarlaması qoyıp berildi. Kún dawamında ótkerilgen ushırasıwlarda ustaz-ilimpazdıń yubiley toyı belgilenip qoymastan, ilajǵa qatnasqan ósip kiyatırǵan jas áwladqa ibrat mektebi bolǵanlıǵı sózsiz. Olardıń kózlerinde «Quwanıshbay atamday professor bolaman» degen maqsetlerdiń ushqınları ayqın sezilip turatuǵın edi.
Ǵayrat Allamuratov
Qaraqalpaq ádebiyatı kafedrası assistenti
