Pedagogika ilimleriniń kandidatı, docent Aminbay Kurbanbaev 1940-jılı Tórtkúl rayonında tuwılǵan. 1965-jılı Tashkent mámleketlik shet tilleri pedagogika institutın tamamlaǵan. Ol óziniń pedagogikalıq jumısın 1965-jılı Qaraqalpaq mámleketlik pedagogika institutı nemis tili kafedrasında oqıtıwshılıqtan basladı. 1972-1974-jılları Azerbayjan shet tilleri instituti stajyorı, 1974-1976-jılları QQMPI nemis tili kafedrası úlken oqıtıwshısı, 1976-1978-jılları Nókis mámleketlik universiteti nemis tili kafedrası baslıǵı, 1978-1980-jılları NMU roman-german filologiyası fakulteti dekanı, 1981-1992-jılları NMU nemis tili kafedrası docenti, 1992-1994-jıllarda Qaraqalpaq mámleketlik universiteti fakultetler aralıq shet tilleri kafedrası baslıǵı, 1994-1998-jıllarında QMU shet tilleri fakulteti dekanı, 1998-jıldan baslap ómiriniń aqırına shekem nemis tili hám ádebiyatı kafedrası docenti lawazımında jumıs isledi.
1975-jılı Kiev mámleketlik shet tilleri pedagogika institutında prof. R.Yu.Barsuk ilimiy basshılıǵında «Metodika obucheniya nemeckim predlogam studentov pervogo kursa karakalpakskoy auditorii (na fakultete inostrannıx yazıkov)» temada kandidatlıq dissertaciyasın jaqladı. 1985-jılı Joqarı Attestaciya komissiyası tárepinen docent ilimiy ataǵın aldı. Kurbanbaev Aminbay Qaraqalpaqstanda nemis til bilimi, nemis hám qaraqalpaq tillerin salıstırıp úyreniw hám nemis tilin qaraqalpaq studentlerine oqıtıwda pidayılıq penen xızmet etip kiyatırǵan ilimpaz edi. Ustaz A.Kurbanbaevtıń 100 den aslam ilimiy-metodikalıq miynetleri baspada járiyalandı. Nemis hám qaraqalpaq tilleriniń aktual máselelerine arnalǵan 2 sabaqlıq, 8 oqıw qollanbası, 2 shınıǵıwlar toplamı, 2 sózlik hám 100 den aslam ilimiy maqala hám tezisler avtorı. Sonday-aq, qaraqalpaq tilinen nemis tiline awdarılǵan ertekler, dastanlar tuwralı ilimiy izertlew jumısların da alıp barǵan.
A.Kurbanbaev nemis tili tarawı boyınsha Qaraqalpaqstandaǵı dáslepki ilim kandidatı hám docenti esaplanadı. Universitette nemis filologiyası kafedrasın shólkemlestiriliwinde belsendilik etken hám onıń birinshi baslıǵı bolıp jemisli miynet etken. Ol Qaraqalpaq mámleketlik universiteti menen Germaniyanıń Bonn universitetiniń birge islesiwdi jolǵa qoyıwǵa tiykar saldı. 1993-jılı Bonn universitetinde 2 aylıq ilimiy stajirovkada bilim alǵan hám sol universitet studentlerine qaraqalpaq hám nemis tillerin salıstırıp úyreniw, sonday-aq, qaraqalpaq folklorı haqqında bayanatlar isleydi. 1997-jılı Bonn qalasında ótkerilgen “Túrkiy xalıqlar dastanları hám jáhán muzıkası” atamasındaǵı xalıqaralıq simpoziumda Qaraqalpaqstan delegaciyası basshısı sıpatında qatnasıp, qaraqalpaq xalqınıń milliy qádriyatların jáhán xalıqlarına tanıstırıwda óziniń úlken úlesin qosqan.
Ustazdıń nemis tili boyınsha islegen ilimiy jumısları nátiyjeleri búgingi kúnde joqarı hám orta arnawlı bilim beriw orınlarında oqıw baǵdarlama hám qollanbalarǵa kiritilgen hám olardan keń paydalanılıp atır. Ómiriniń sońǵı kúnleri de shákirtleri menen birgelikte 25 mıńnan artıq sózlerden ibarat “Nemisshe-qaraqalpaqsha sózlik” kitaptı tayarlap baspaǵa tapsırdı hám ol miyneti baspadan shıǵıw aldında tur. A.Kurbanbaev Qaraqalpaqstan televideniesi hám de baspa sózinde watanparwarlıq, jaslar tálimi hám tárbiyası, ádep-ikramlılıq, ekologiya hám qorshaǵan ortalıqtıń tazalıǵı qusaǵan tárbiyalıq xarakterdegi maqalalar menen qatnasıp turdı.
Aminbay Kurbanbaev qay jerde, qanday lawazımda islemesin, óziniń shólkemlestiriwshilik uqıbı, miynet súygishligi, talapshańlıǵı menen kózge túsip, kásiplesleri hám student-jaslar arasında úlken abırayǵa eristi. Onıń islegen kóp jıllıq miynetleri húkimetimiz tárepinen ılayıqlı bahalanıp, Qaraqalpaqstan Respublikası Joqarǵı Keńesiniń Húrmet jarlıǵı, al 2001-jılı Qaraqalpaqstan Respublikasında xızmet kórsetken xalıq bilimlendiriwi xızmetkeri húrmetli ataǵı berildi. Haq kewil insan, kishi peyil, tereń bilimli Ustaz, Hajı Aminbay Kurbanbaev barlıǵımızdıń yadımızda mańgi saqlanadı. Ustazdıń keyingi ómiri ózi miyras qaldırǵan miynetlerinde jasaydı.
Nemis tili hám ádebiyatı kafedrası jámááti
