Ametov Qıpshaqbay Qaraqalpaqstan Respublikası Moynaq rayonı jetinshi awıl 1930-jılı 20-iyunda diyxan shańaraǵında tuwılǵan. Qaraqalpaqstan ASSR húkimeti qararı menen 1940-jılı Moynaq rayonınan barlıq diyxan xojalıqları Moynaq rayonınan Qońırat rayonına kóshirip, Q.Ametovtıń shańaraǵı da kóshirildi. Solay etip, Qońırat rayonı jetinshi awılda Qızıl ásker mektebiniń 8-klassınan 1944-jılı mart ayında Xojeli peduchilishesiniń muǵallimlerdi tayarlaw 6 aylıq kursına jiberilip, onı sol jılı tabıslı tamamladı.
Qaraqalpaqstan ASSR Xalıq bilimlendiriw ministrligi tárepinen kurstı tamamlaǵannan keyin Qonırat rayonına (házirgi Qanlıkól rayonı aymaǵında) baslawısh klass mektep muǵallimi etip jumısqa jiberildi hám ol jerde 1945-jıldıń sentyabr ayına shekem jemisli miynet etti. Q.Ametov 1945-jılı sentyabr ayında Qaraqalpaq mámleketlik pedagogikalıq institutı Tariyx fakultetine oqıwǵa qabıllanıp, usı joqarı oqıw ornın 1949-jılı tabıslı pitkerip shıqtı. Qaraqalpaqstan ASSR Xalıq bilimlendiriw ministrligi tárepinen instituttı tabıslı tamamlaǵannan keyin, usı institutqa SSSR tariyxı kafedrasına oqıtıwshı etip jumısqa jiberildi.
Q.Ametovtıń ilimge bolǵan qızıǵıwshılıǵı 1950-jılı burıńǵı SSSR Ilimler akademiyasınıń Shıǵıstanıw institutı aspiranturasına oqıwǵa qabıl etildi. Aspiranturanıń teoriyalıq kursın tamamlap kandidatlıq dissertaciyası ústinde ilimiy-izertlewler alıp bardı. 1955-jılı aspirantura múddetiniń tamamlanıwı menen Ózbekstan Ilimler akademiyası Prezidiumı qararı menen Qaraqalpaq mámleketlik pedagogikalıq institutı Tariyx kafedrasına jumısqa jiberildi. 1955-jıl sentyabr ayınan baslap aǵa oqıtıwshı lawazımında, al 1959-jılı Tariyx kafedrası baslıǵı bolıp isledi. 1960-jılı Ózbekstan Ilimler akademiyası Qaraqalpaqstan filialına Sovet dáwiri tariyxı sektorında úlken ilimiy xızmetker bolıp miynet jolın dawam ettirdi.
Q.Ametov 1967-jılı «Советской власти в Каракалпакии» atamasındaǵı kandidatlıq dissertaciyasın tabıslı qorǵap shıǵıp, «Tariyx ilimleri kandidatı» ilimiy dárejesin alıwǵa miyasar boldı. Al, 1971-jılı bolsa, «úlken ilimiy xızmetker» ilimiy ataǵın alıwǵa eristi. Ilimiy-izertlew jumıslarına baylanıslı monografiya, respublikalıq hám shet el jurnallarında ilimiy maqalalar hám tezislerin baspadan shıǵardı. Q.Ametov mámleketlik hám joqarı oqıw orınlarındaǵı kóp jıllıq jemisli miynetleri, elimizdiń rawajlanıwı, xalqımızdıń siyasiy, mánawiy sanasın hám abadanshılıǵın kóteriwge qosqan úlesi ushın 1979-jılı «Qaraqalpaqstan ASSRına miyneti singen mádeniyat xızmetkeri» Húrmetli ataǵı menen sıylıqlandı. Ol 1982-jıldan ómiriniń aqırına shekem (1992-jıl) Nókis mámleketlik universiteti Tariyx kafedrasında docent lawazımında jemisli miynet etti.
Gózzal Jumamuratova
Tariyx fakulteti 2-kurs studenti
