Professor Qıtaybek Sarıbaev 1932-jılı 11-yanvarda Qaraózek rayonında tuwılǵan. 1949-jılı Shımbay pedagogikalıq uchilishesin, 1954-jılı Qaraqalpaq Mámleketlik pedagogikalıq institutı tariyx fakultetin tamamlaǵan.
Q.Sarıbaev óz miynet jolın 1950-jılı Qaraózek rayonı Berdaq atındaǵı mektepte oqıtıwshı bolıwdan baslaydı. Ol 1954-jılı Nókis mámleketlik pedagogikalıq institutınıń tariyx fakultetin qızıl diplom menen pitkergennen keyin 1965-jılǵa shekem ol dáslep respublikalıq muǵallimlerdiń bilimin jetilistiriw hám qayta tayarlaw institutında tariyx kabineti baslıǵı, soń usı instituttıń direktorı, oblastlıq jaslar komitetiniń bólim baslıǵı, Qaraqalpaqstan respublikalıq partiya komitetiniń juwaplı xızmetkeri, Ózbekstan IA nıń Qaraqalpaqstan bólimi tariyx, til hám ádebiyat institutında ilimiy xızmetker lawazımlarında isledi. Qaraqalpaq mámleketlik pedagogikalıq institutınıń tariyx kafedrasınıń baslıǵı bolıp isleydi.
Óziniń yarım ásirge shamalas tariyxına iye Qaraqalpaq Mámleketlik universiteti ashılıp, dáslep tariyx-geografiya, tariyx-huqıqtanıw hám tariyx gumanitar fakulteti hám búgingi kúni óz aldına tariyx fakulteti bolıp jetilisiwinde professor Qıtaybek Sarıbaevtıń xızmeti ayrıqsha boldı. 1976-1986-jılları universitette jańadan ashılǵan tariyx-huqıqtanıw fakultetiniń birinshi dekanı, 1986-1995-jılları universitette Ózbekstan hám Qaraqalpaqstan tariyxı kafedrasınıń baslıǵı hám professorı lawazımında isledi. Alımnıń ilimiy dóretpesinde qaraqalpaq xalqınıń jer-suw qatnasıqları tariyxın izertlew hám suwǵarma diyxanshılıq egiwdiń mexanizaciyalawın sóz etiw tiykarǵı orındı iyeleydi.
Q.Sarıbaev 1966-jıldan baslap tariyx ilimleriniń kandidatı, 1968-jıldan baslap docent, 1986-jıldan berli professor lawazımında isledi. Q.Sarıbaev 1975-jılı «Qaraqalpaqstan» baspasınan basılıp shıqqan, eki tomlıqtıń 1-tomınıń hám 1988-baspadan shıqqan bir tomlıq «Qaraqalpaqstan tariyxı» avtorlarınıń biri sıpatında jańa maǵlıwmatlar menen úles qostı. 1995-jıldan baslap ómiriniń sońǵı kúnlerine shekem ÓzIA Qaraqalpaqstan bóliminiń tariyx-arxeologiya, etnografiya institutında jańa tariyx bóliminiń baslıǵı lawazımında isledi. Q.Sarıbaev júzden aslam ilimiy miynet hám sabaqlıqlar jarattı. Ol 2003-jılı «Qaraqalpaqstan» baspasınan basılıp shıqqan Qaraqalpaqstannıń jańa tariyxın jazǵan avtorlardıń biri. K.Sarıbaevtıń 8 ilimiy monografiya hám 6 oqıw-metodikalıq qollanba hám sabaqlıqları respublikamızdıń joqarı oqıw orınlarında hám orta mekteplerde Qaraqalpaqstan tariyxın úyreniwge xızmet etip kiyatır.
Professor Q.Sarıbaev 1996-jıldan baslap, Ózbekstan Respublikası Ilimler Akademiyasınıń Qaraqalpaqstan bólimi gumanitar institutınıń «Eń jańa tariyx» bólimine basshılıq etip, usı institut ta dúzilgen Ózbekstan tariyxı boyınsha qánigelestirilgen ilimiy keńestiń aǵzası hám ilimiy seminardıń basshısı boldı.Ilimpazdıń miynetleri bahalanıp, 1974-jılı Qaraqalpaqstanǵa xızmet kórsetken mádeniyat ǵayratkeri, 1979-jılı Qaraqalpaqstanǵa miyneti sińgen ilim ǵayratkeri húrmetli ataqları beriledi.
Professor Q.Sarıbaev Respublikamızda ilimniń hám joqarı bilim tarawınıń rawajlanıwına salmaqlı úles qosqan pidayı alım hám ustaz bolıp búgingi tariyxshı qánigelerdiń mángi esinde saqlanadı.Búgingi kúni Qıtaybek Sarıbaevtıń shańaraǵın ilimpazlar shańaraǵı desek boladı. Sebebi onıń balaları Maman Sarıbaev tariyx ilimi doktorı bolsa, Áziz Sarıbaev tariyx ilimleri kandidatı, docent bolıp, Ájiniyaz atındaǵı Nókis Mámleketlik pedagogikalıq institutında ilimiy pedagogikalıq xızmet kórsetip kiyatır. Aqlıqları Azamat, Salamat, Abat ata-jolın quwıp ilimpazlıqtı dawam etip kiyatır.
Jalǵas Aytmuratov
QMU «Arxeologiya kafedrası» docenti
