Berdaq atındaǵı Qaraqalpaq mámleketlik universiteti Fizika fakulteti professor-oqıtıwshıları hám ziyrek student-jasları Shomanay rayonı XBBne qaraslı 7-sanlı ulıwma orta bilim beriw mektebinde bolıp, ol jerde mekteptiń pitkeriwshileri hám joqarı klass oqıwshıları menen ushırastı. Ushırasıwdı ótkeriwden tiykarǵı maqset Ózbekstan Respublikası Prezidenti Sh.Mirziyoyev tárepinen 2022-jıl 5-aprel kúni xalıq bilimlendiriw tarawında ámelge asırılıp atırılǵan reformalardıń nátiyjeliligin arttırıw boyınsha videoselektor májilisinde berilgen tapsırmasınıń orınlanıwı, sonday-aq mektep muǵállimlerin jańa metodika tiykarında qayta tayarlaw bolıp esaplanadı.
Ushrasıwda Fizika fakulteti dekanı, docent A.Muratov shıǵıp soylep, Húrmetli Prezidentimiz tárepinen bilimlendiriw tarawında alıp barılıp atırılǵan jumıslarǵa keń toqtalıp ótti hám mámleketimizde jańa ózgerisler haqqında tolıq maǵlıwmatlar berdi. Pitkeriwshi jaslardı joqarı oqıw orınlarında bilim alıwǵa shaqırdı. Pitkeriwshi jaslarǵa ózleriniń másláhát hám keńesleri menen f-m.i.d., professor Q.Ismaylov, PhD. docent K.Reymov, PhD. docent A.Abubakirovlar hám mámleketlik stipendiantlar D.Sarsenbaev, T.Yuldashevlar shıǵıp soyledi. Oqıwshı jaslar tek ǵana ustazlar menen ushrasıp qoymastan, fakultettiń «Zakovat» klubı aǵzaları menen birgelikte bilimlerin sınaqtan ótkerdi hám onnan soń voleybol boyınsha universitet chempionı Fizika fakultetinıń qızlar komandası mekteptiń oqıwshı jaslarına master klass kórsetti. Bul ushırasıw mektep oqıwshılarında úlken qızıǵıwshılıq payda etip hám hár biriniń kewlinde student bolıw úmitin oyattı.
A.Bijanov Fizika fakulteti dekanınıń
oqıw isleri boyınsha orınbasarı
