Búgin Berdaq atındaǵı Qaraqalpaq mámleketlik universitetinde «Házirgi qaraqalpaq filologiyasınıń áhmiyetli máseleleri» atamasında professor Quwanıshbay Orazımbetovtıń 60 jıllıq yubileyine baǵıshlanǵan xalıq aralıq ilimiy-teoriyalıq konferenciya bolıp ótti. Onda jazıwshı-shayırlar, ilimpazlar, professor-oqıtıwshılar, nuraniylar,student-jaslar hám ǵalaba xabar qurallarınıń wákilleri qatnastı. Konferenciyanı universitetimizdiń Oqıw isleri boyınsha prorektorı Olimjon Duysenbaev ashıp berdi hám alıp bardı. Konferenciyada Qaraqalpaqstan Respublikası Joqarǵı Keńesiniń Komitet baslıǵı D.Qurbaniyazov shıǵıp sóylep, yubiley múnásibeti menen Qaraqalpaqstan Respublikası Joqarǵı Keńesiniń qutlıqlawın oqıp esittirdi.
Sonday-aq Berdaq atındaǵı Qaraqalpaq mámleketlik universiteti rektorı A.Reymov Qazaqstan Respublikasında xızmet saparında bolıwına baylanıslı zoom platforması arqalı onlayn qatnasıp, óz isiniń haqıyqıy pidayısı bolǵan Quwanıshbay Orazımbetovtı búgingi 60 jıllıq yubileyi menen qutlıqlap, konferenciya jumıslarına tabıslar tiledi. Bunnan soń Ózbekstan Respublikası Oliy Majlisi deputatı M.Ibragimov, Qaraqalpaqstan Jazıwshılar awqamınıń baslıǵı, Qaraqalpaqstan xalıq shayırı K.Karimov, Qaraqalpaqstan xalıq jazıwshısı, Berdaq atındaǵı respublikalıq sıylıqtıń laureatı M.Nızanov hám basqalar, professor, ilimpaz, filologiya ilimleriniń doktorı Quwanıshbay Orazımbetov dóretiwshiligine toqtap ótip, 60 jıllıǵı menen qutlıqladı. Sonıń menen bir qatarda konferenciyada «Házirgi qaraqalpaq ádebiyattanıw iliminiń áhmiyetli máseleleri» boyınsha Qaraqalpaq mámleketlik universiteti docenti Q.Turdıbaev, «Analysis of publications in turkey on karakalpak culture» atamaında Еgey universiteti docenti –Pinar Fedakar, (Túrkiya, Izmir), «Poeziyanı úyreniwdiń jańa dáwirin baslaǵan ilimpaz» temasında Qaraqalpaq mámleketlik universiteti docenti B.Genjemuratovlar bayanat jasadı.
Konferenciyada Qaraqalpaq filologiyası ilimi tariyxında óshpes iz qaldırǵan: Nájim Dáwqaraev, Qálli Ayımbetov, Ismayıl Saǵıytov, Marat Nurmuxammedov, Dosjanbay Nasırov, Srajatdin Axmetov, Qabıl Maqsetov, Zeytuna Nasrullaeva, Esemurat Berdimuratov, Kenjebay Ubaydullaev, Qálimbet Sultanov, Kamal Mámbetov, Mádenbay Dáwletov, Oraqbay Dospanov, Ábdisayıt Paxratdinov, Abatbay Dáwletov, Ayjarıq Bekbergenov Húsniddin Hámidov, Yunis Paxratdinov, Sarıgúl Bahadırovalar sıyaqlı hám basqa da kóplegen ilim jolındaǵı pidayı insanlardıń miynetlerin ayrıqsha maqtanısh penen tilge alındı. Mine, usınday ilim pidayıları haqqında sóz etkende búgingi kúnde pedagogikalıq xızmet penen birge ilimiy dóretiwshilikti teńdey alıp barıp, ilimniń mashaqatlı jolın, barlıq qıyınshılıqların basıp ótip, ózleriniń ilimiy mekteplerin jaratqan ilimpazlar Qurbanbay Járimbetov, Quwanıshbay Orazımbetov, Shámshetdin Abdinazimovlardı xalkımız iygiligine xızmet etip kiyatırǵan perzentleri, bizin ádiwli ustazlarımız sıpatında tilge alsaq arzıydı. Sonday insanlardıń biri Filologiya ilimleriniń doktorı Quwanıshbay Orazımbetov qaraqalpaq ádebiyattanıw iliminde jańasha bir ilimiy-izertlew baǵdarına tiykar saldı hám bul baǵdardaǵı ilimiy-izertlew miynetleri menen qaraqalpaq ádebiyattanıw iliminiń rawajlanıwına salmaqlı úles qosıp kelmekte. Ilimpazdıń sabaqlıq hám oqıw-qollanbaları, ilimiy-metodikalıq miynetleri respublikamızdıń úzliksiz bilimlendiriw basqıshlarında áhmiyetli oqıw ádebiyatları sıpatında qollanılıp kiyatır. Quwanıshbay Orazımbetov joqarı bilimlendiriw tarawında filolog qánigelerdi tayarlawda tájiriybeli pedagog, ustaz sıpatında da óz ornına, úlken abıroyǵa iye.
