Jaslar-keleshek qurıwshıları. Olardı tereń bilim iyelewge baǵdarlaw, mámleketimizde jaslar ushın jaratılǵan imkaniyatlar menen jaqınnan tanıstırıw maqsetinde orınlarda ushırasıwlar, kesheler shólkemlestirilmekte. Ulıwma orta bilim beriw mektepleri pitkeriwshilerin joqarı oqıw orınlarına qamtıp alıw dárejesin kóteriw maqsetinde Joqarı oqıw ornı wákilleri menen Shımbay rayonında eki kún dawamında jámi 48 meketeptiń 1202 pitkeriwshi oqıwshıları menen ushrasıw bolıp ótti. Ushırasıwǵa Qaraqalpaqstandaǵı joqarı oqıw orınlarında jaslarǵa tálim-tárbiya berip atırǵan professor-oqıtıwshılar hám pitkeriwshi klass oqıwshıları qatnastı.
Rayondaǵı 38-sanlı mektepte 40- 41- 44-49-sanlı mekteplerdiń pitkeriwshi klass oqıwshıları hám 14-sanlı mektepte 1-5-6-24-sanlı mekteplerdiń pitkeriwshi klass oqıwshıları menen ótkerilgen ushırasıwǵa Berdaq atındaǵı Qaraqalpaq mámleketlik universitetiniń Pedagogika ilimler boyınsha filosofiya doktori PhD hám Magistratura bólimi baslıǵı I.Allambergenov qatnastı hám shıǵıp sóyledi. Ol óz sózinde pitkeriwshi oqıwshılarǵa universitet studentleri ushın jaratılǵan imkaniyatlar, berilgen múmkinshililer haqqında túsinik berip ótti. Sol qatarda universitette studentlerge jaratılǵan shárayatlar, tálim baǵdarları, tálım túrleri, qániygelikler, tálim beriwshi proffesor-oqıtıwshılar hám olardıń sabaq ótiw usılları, metodları, kitapxanada studentler izlegen barlıq kitaplardı taba alıw múmkúnshiligi, universitet qońsılas hám basqada shet el mámleketleri menen dúzilgen shártnamalar haqqında keńnen túsindirip ótti.
Sońǵı jıllarda mámleketimizde jaslardıń intellektual qábiliyetin júzege shıǵarıw, shet tillerine bolǵan qızıǵıwshılıǵın ele de arttırıw, olardaǵı bilim hám kónlikpelerdi jetilistiriw boyınsha Prezidentimiz tárepinen bir qatar párman hám qararlar qabıl etildi. Joqarı oqıw orınlarına qabıl etilgen jaslar menen islesiw, qosımsha jataqxanalar qurıw, bos waqtın mazmunlı ótkeriw, sport dógereklerine tartıw maqsetinde oqıw orınlarınıń materiallıq-texnikalıq bazası bekkemlendi. Búgingi kúnde Berdaq atındaǵı Qaraqalpaq mámleketlik universitetinde tek ǵana Qaraqalpaqstanlı emes, qońsı respublikalar hám wálayatlardan kelip bilim alıp atırǵan jaslar ushın 3 studentler turaq jayı islep tur. Bunnan soń pitkeriwshi klass oqıwshıları universitettegi tálim túrleri, joqarı kórsetkishke iye qánigelikler haqqında ózleriniń qızıqtırǵan sorawların berdi hám tiyisli juwaplar aldı.
Gúlchexra Kalmuratova
Magistratura bólimi Jurnalista qániygeliginiń magistrantı
