Berdaq atındaǵı Qaraqalpaq mámleketlik universiteti Tariyx fakulteti Arxeologiya bakalavr tálim baǵdarınıń 3-kurs studentleri oqıw jobasına sáykes ámeliyat basshıları menen birgelikte 2022-jıl 16-may kúni Bograxan esteliginde arxeologiyalıq-etnografiyalıq qánigelik ámeliyatın atqarıw maqsetinde, Qońırat rayonı Qıpshaq APJ, Mashan awılına jol aldı. Bograxan qalası Qońırattan 10 km arqa-batısta, Ámudariyanıń orta ásirlerge tiyisli tarmaqlarınan biri bolǵan eski Qarakól kanalınıń oń qırǵaǵında jaylasqan. Bograxan qalasın Ya.G.Gulyamov X-ásirdegi Madminiya menen baylanıstıradı. Bul xalıq jasaw ornı S.P.Tolstov basshılıǵında XX ásirdiń 50-60-jıllarında Xorezm arxeologiyalıq hám etnografiyalıq ekspediciyası tárepinen anıqlanǵan. 

Estelik 1963-jılı N.Dawqaraev atındaǵı Tariyx, til hám ádebiyatı institutı V.N.Yagodin basshılıǵında hám 1998-2003-jıllarda Berdaq atındaǵı Qaraqalpaq mámleket universiteti Arxeologiya kafedrası tárepinen úyrenilgen. Qala citadel, shaxristan hám qorshalmaǵan rabad bólimlerinen ibarat bolıp, ulıwma maydanı 80 gektardan artıq. Qorshalmaǵan rabadtıń oraylıq bóliminde 250×200 m. shamada shaxristan jaylasqan hám ol qorǵanıw diywalı menen oralǵan. Jáne de 60×50 m. ólshemdegi citadel shaxristannıń arqa-batıs bólegin iyelep, ol átirapındaǵılardan 0,5-3 m. bálentlikte jaylasqan. Jaqsı niyetler menen ámeliyattiń birinshi kúni Bograxan ata maxbarasın ziyaratlawdan baslandı. Bul ámeliyatqa Tariyx fakulteti Arxeologiya kafedrası baslıǵı, docent. J.Hakimniyazov, t.i.k., doc. M.Turebekov hám assistent M.Tolıbaevlar basshılıq etpekte. Álbette, bul ámeliyatımız da úlken jańalıqlarǵa tolı boladı, – degen jaqsı niyettemiz! 

R.Tlemisov, A.Tóremuratova 

Arxeologiya bakalavr tálim baǵdarı 3-kurs studentleri.