Berdaq atındaǵı Qaraqalpaq mámleketlik universiteti Matematika fakulteti “Differenciallıq teńlemeler” kafedrası professor-oqıtıwshıları Shomanay rayonı XBBne qaraslı 14 hám 16-sanlı ulıwma orta bilim beriw mektebinde bolıp, ol jerde mekteptiń pitkeriwshileri hám joqarı klass oqıwshıları menen ushırastı. Ushırasıwdı ótkeriwden tiykarǵı maqset Ózbekstan Respublikası Prezidenti Sh.Mirziyoyev tárepinen 2022-jıl 5-aprel kúni xalıq bilimlendiriw tarawında ámelge asırılıp atırılǵan reformalardıń nátiyjeliligin arttırıw boyınsha videoselektor májilisinde berilgen tapsırmalardıń orınlanıwın támiyinlew, sonday-aq mektep muǵállimlerin jańa metodika tiykarında qayta tayarlaw bolıp esaplanadı.

Ushırasıwda “Differenciallıq teńlemeler” kafedrası baslıǵı J.Otarova sózge shıǵıp, bilimlendiriw tarawındaǵı jańalıqlar, mámleketimizde jaratılǵan shárayatlar, sonday-aq universitette, Matematika fakultetinde alıp barılıp atırılǵan jumıslar, student jaslardıń jetiskenlikleri haqqında aytıp ótti. Mektep pitkeriwshileri ushın matematika tarawında bilim hám kónlikpelerin rawajlandırıw maqsetinde docent Q.Elgondiev, Ó.Qurbanbaevlar master klasslar ótkerdi. Sonday-aq, Qaraqalpaq mámleketlik universitetiniń student-jaslarǵa jaratılǵan shárayatlar haqqında oqıwshılarǵa maǵlıwmatlar berilip, sonıń menen bir qatarda mámleketimizde jaslarǵa, hayal-qızlarǵa jaratılıp atırılǵan imkaniyatlar, haqqında assistent Sh.Erejepova aytıp ótti. Ushırasıw oqıwshılarda tereń tásir qaldırıp, oqıwshılar ózleriniń qızıqtırǵan sorawlarına juwaplar aldı.