Búgin Berdaq atındaǵı Qaraqalpaq mámleketlik universitetinde «Awdarma teoriyası hám ámeliyatınıń áhmiyetli máseleler innovaciyalar, perspektivalar hám olardı ámelge asırıw jolları» atamasındaǵı Respublikalıq ilimiy-ámeliy konferenciya bolıp ótti. Onda, ilimpazlar, professor-oqıtıwshılar, student-jaslar qatnastı. Konferenciyanı universitetimizdiń Oqıw isleri boyınsha prorektorı Olimjon Duysenbaev ashıp berdi hám Búgingi konferenciyada awdarma teoriyası hám ámeliyatınıń tiykarǵı máseleleri, shet tillerin oqıtıwda innovaciyalıq metodlar, til bilimi, ádebiyattanıw hám de salıstırmalı tipologiyanıń aktual máseleleri hár tárepleme kórip shıǵılıwına sonday-aq konferenciya jumısların jetilistiriw áhmiyetli wazıypalardan biri ekenligin atap ótip, konferenciyanıń jumıslarına tabıslar tiledi. Konferenciyanı universitetimizdiń Awdarma teoriyası hám ámeliyatı kafedrası baslıgı J.Seytjanov alıp bardı.
Bunnan soń Shet tilleri fakulteti dekanı f.i.k. docent Dj.Kurbanbaev hám p.i.k. docent G.Tleumuratovlar sózge shıǵıp, Shet tillerden ana tilimizge yamasa ana tilimizden shet tillerine awdarma jumısların islew, Qaraqalpaqstan aymaǵında turizmdi rawajlandırıw, shet ellerden turistlerdi tartıw, olar menen sinxron awdarmada janlı sóylesiwler ámelge asırıw, sonday-aq, jana, zamanagóy tiptegi kadrlar tayarlaw máselesi búgingi kún tártibinde aktual máseleler ekenligin ásirese, bul baǵdarda Prezidentimizdin 2021-jıl 19-may kúngi 5117-sanlı «Ózbekstan Respublikasında shet tillerin úyreniwdi ǵalabalastırıw iskerligin sapa jaǵınan jańa basqıshqa alıp shıǵıw is-ilajları haqqında»ǵı qararda kórsetilgen, sonıń menen bir qatarda búgingi ótkerilip atırılǵan Respublikalıq konferenciyanıń alǵa qoyǵan maqseti awdarma teoriyası hám ámeliyatı boyınsha, shet tillerin oqıtıw tarawında alıp barılıp atırılǵan jumıslardı elede rawajlandırıw, pikir hám usınıslardı bildiriw ushın ortalıq jaratıw, tájiriybe hám kónlikpelerdi qáliplestiriwden ibarat ekenligin aytıp ótti. Sonday-aq konferenciyada NMPI docenti D.Mamirbaeva, G.Kidirbaeva, N.Babaniyazova, QMU magistrantı G.Koblanova hám QMU student D.Bekpulatovalar bayanat jasadı. Konferenciyaǵa Ózbekstanıń bir qatar JOOlarınan professor-oqıtıwshılar zoom platforması arqalı onlayn qatnasıp, bárshe konferenciya qatnasıwshılarına hám konferenciyanıń jumıslarına tabıslar tiledi. Konferenciya óz jumısın sekciyalar boyınsha dawam ettirdi.
QMU baspasóz xızmeti.
