Ózbekstan Respublikası Joqarı hám orta arnawlı bilimlendiriw ministrligi, Ózbekstan espublikası Mádeniyat ministrligi hám Ózbekstan Respublikası Jaslar isleri agentliginiń 2022-jıl 11-aprel kúngi «Joqarı oqıw orınlarında «Jıldıń eń belsendi studentler teatr studiyaları» tańlawın shólkemlestiriw hám ótkeriw haqqında»ǵı qospa qararına muwapıq 2022-jıl 25-may kúni Berdaq atındaǵı Qaraqalpaq mámleketlik akademiyalıq muzıkalı teatrında Qaraqalpaqstan Respublikasındaǵı joqarı oqıw orınları studentleri arasında «Jıldıń eń belsendi studentler teatr studiyaları» tańlawınıń ekinshi aymaqlıq basqıshı ótkerildi.
Tańlawdı ótkeriwden maqset mámleketimizde ámelge asırılıp atırılǵan keń kólemli reformalarda jaslardıń belsendiligin támiyinlew, joqarı mánawiyatlı, erkin pikirleytuǵın, zamanagóy ilim-pán jetiskenliklerin puxta ózlestirgen, hár tárepleme salamat hám bárkamal áwladtı tárbiyalawǵa qaratılǵan jaslarǵa baylanıslı siyasattı ámelge asırıw, sonday-aq, student-jaslardı teatr kórkem ónerine muxabbat ruwxında tárbiyalaw hám mánawiyatqa baǵdarlaw, joqarı oqıw orınlarında alıp barılıp atırılǵan ruwxıy-aǵartıwshılıq jumıslar nátiyjeliligin jáne de arttırıwǵa erisiw hám qábiletli jaslarǵa óz imkaniyatların júzege shıǵarıwları ushın imkaniyat jaratıp beriw hám olardı xoshametlewden ibarat bolıp tabıladı.
Tańlawda Qaraqalpaq mámleketlik universitetiniń «Jayxun» studentler teatr studiyası, Nókis mámleketlik pedagogikalıq institutınıń «Shuǵla» studentler teatr studiyası, Tashkent informaciyalıq texnologiyalar universiteti Nókis filialınıń «Tań nurı» studentler teatrı, Qaraqalpaqstan awıl xojalıǵı hám agrotexnologiyalar institutınıń «Tumar» studentler teatr studiyası, Nawayı mámleketlik kánshilik institutı Nókis filialınıń «Samo» studentler teatr studiyaları óz-ara bellesti. Studentler ózleriniń, teatr kórkem ónerine bolǵan qızıǵıwshılıqların óz aktyorlıq sheberlikleri arqalı tamashagóylerge kórsetti.
Tańlaw juwmaǵında Tashkent informaciyalıq texnologiyalar universiteti Nókis filialınń “Tań nurı” studentler teatr studiyası “LIFT” spektakli menen “Eń jaqsı spektakl” nominaciyasın qolǵa kiritip, tańlaw jeńimpazı boldı hám keyingi basqıshqa jollama aldı.
Sonday-aq, Qaraqalpaq mámleketlik universitetiniń “Jayxun” studentler teatr studiyası “Zaman aǵımı” spektakli menen “Áhmiyetli máseleni saxnada sáwlelendirgeni ushın” nominaciyasına, Nókis mámleketlik pedagogikalıq institutınıń “Shuǵla” studentler teatr studiyası “Órtengen shalbar” spektakli menen “Milliy úrp-ádet dástúrlerimizdi hám qádiriyatlarımızdı sáwlelendirgeni ushın” nominaciyasına, Qaraqalpaqstan awıl xojalıǵı hám agrotexnologiyalar institutınıń “Tumar” studentler teatr studiyası aǵzası Erdáwlet Begdullaev “Eń jaqsı erkek roli ushın” nominaciyasına, Tashkent informaciyalıq texnologiyalar universiteti Nókis filialınıń “Tań nurı” studentler teatr studiyası aǵzası Juldız Dáwletmuratova “Eń jaqsı hayal roli ushın” nominaciyasına, Nawayı mámleketlik kánshilik institutı Nókis filialınıń “Samo” studentler teatr studiyası baslıǵı Bektash Qadirov “Jıldıń eń belsendi studentler teatr studiyaları baslıǵı” nominaciyasına ılayıq dep tabıldı.
Jeńimpazlar shólkemlestiriwshileri tárepinen diplom menen sıylıqlandı.
Jaslar menen islesiw,
ruwxıylıq hám aǵartıwshılıq
bólimi metodisti Rasul Óteniyazov
