Ózbekstan Respublikası Prezidentiniń 2017-jıl 14-mart kúngi «Huqıqbuzarlıq profilaktikası hám jınayatshılıqqa qarsı gúresiw sistemasın jáne de jetilistiriw
is-ilajları haqqında»ǵı PQ-2833-sanlı qararına muwapıq hápteniń hár piyshembi kúni huqıqbuzarlıq profilaktikası kúni dep belgilengen. Usı tiykarda búgin Dene mádeniyatı fakulteti student-jasları arasında jınayatshılıq hám huqıqbuzarlıqtıń aldın alıw, oǵan qarsı gúresiw hám olar arasında profilaktikalıq úgit-násiyatlaw jumısların alıp barıw maqsetinde «Huqıqbuzarlıq profilaktikası hám jınayatshılıqqa qarsı gúresiwdi jáne de jetilistiriw» atamasında profilaktikalıq úgit-násiyatlaw ilajı ótkerildi.
Ilajǵa Qaraqalpaq mámleketlik universiteti inspektorı, kapitan I.Erejepov, Dene mádeniyatı teoriyası hám metodikası kafedrası úlken oqıtıwshısı N.Akimov sonday-aq, dene mádeniyatı tálim baǵdarınıń 2-kurs studentleri qatnastı. Ilajda kapitan I.Erejepov óz bayanatında huqıqbuzarlıq hám jınayatshılıqtıń aldın alıw boyınsha mámleketimizde bir qansha reformalar ámelge asırılıp atırǵanlıǵı, qabıl etilip atırǵan huqıqıy-normativ hújjetler, jaslardıń huqıqıy mádeniyatın joqarılatıw, puqaralardıń nızamǵa boysınıwları, huqıqbuzarlıq hám jınayatshılıqqa qarsı gúresiw arqalı jámiyetlik tártipti hám qáwipsizlikti saqlaw máseleleri, jınayatshılıqtıń erte aldın alıw zárúrligi, jámiyette júris-turıs qaǵıydaları, jol transport háreketi hám onnan paydalanıw qáwipsizligi qaǵıydaları, júz beriwi múmkin bolǵan huqıqbuzarlıqlar aqıbetinde elimiz ekonomikasına keltiriletuǵın zıyanlar, búgingi kúnde jaslar tárepinen islenip atırǵan jınayatlar, kafe-restoranlarda spirtli ishimlikler iship jánjellesiw halatları, bir-birine dene jaraqatların jetkeriw hám basqa da hár túrli jınayıy islerge qol urıp, jınayıy juwapkershilikke tartılıwdıń aqıbetleri haqqında atap ótti.
Ilaj sońında studentler ózleriniń qızıqtırǵan sorawlarına tiyisli juwaplar aldı. Ótkerilgen ilajdıń tiykarǵı maqseti jaslar arasında huqıqbuzarlıq hám jınayatshılıqtıń erte aldın alıw boyınsha keńnen úgit-násiyatlaw jumısların alıp barıw, sonıń menen birge jaslardı zárúr maǵlıwmatlar menen tanıstırıp barıw bolıp tabıladı.
R.Óteniyazov
Dene mádeniyatı fakultetiniń
jaslar menen islesiӯ boyınsha dekan orınbasarı
