Usı jıldıń 11-iyun kuni Berdaq atındaǵı Qaraqalpaq mámleketlik universitetinde «Konstituciyalıq reformalardı ámelge asırıw arqalı mámlekettiń rawajlanıw jolların belgilew» atamasında ushırasıw bolıp ótti. Ushırasıwda Ózbekstan Respublikası Senatı aǵzası, Senattıń Aralboyı regionın rawajlandırıw máseleleri hám ekologiya komitetiniń baslıǵı orınbasarı B.Matmuratov Ózbekstan Respublikası Oliy Majlis Nızamshılıq palatası deputatı, Nızamshılıq palatasınıń Byudjet hám ekonomikalıq reformalar komiteti aǵzası. L.Seytova, Qaraqalpaqstan Respublikası Joqarǵı Keńesi deputatı, Qaraqalpaqstan Respublikası Joqarǵı Keńesiniń nızamshılıq, sud huqıq hám korrupciyaǵa qarsı gúresiw máseleleri komiteti baslıǵı Z.Reymova, Insan huqıqları, mámleketlik huqıq hám basqarıw kafedrası docenti. X.Kabulov, Ulıwma ekonomikalıq pánler kafedrası baslıǵı, professor G.Utemuratova, Yuridika fakulteti dekanı, professor E.Qutıbaeva hám student-jaslar qatnastı. Ushırasıwdı universitetimizdiń ruwxıy-aǵartıwshılıq isleri boyınsha prorektorı S.Alauatdinov ashıp berdi hám alıp bardı.
Eń dáslep Ózbekstan Respublikası Senatı aǵzası, Senattıń Aralboyı regionın rawajlandırıw máseleleri hám ekologiya komitetiniń baslıǵı orınbasarı B.Matmuratov, sózge shıǵıp, ol óz bayanatında Konstituciya Ózbekstandı demokratiyalıq huqıqıy mámleket sıpatında jáhánge tanıtqanı onda kóp milletli xalqımız mámleketlik hákimiyattıń birden-bir deregi ekenligi kórsetilgenligin hám insannıń huqıq hám erkinlikleri joqarı qádiriyat dep tán alınǵan hám hár tárepleme kepillengenligin aytıp ótti.
Bunnan soń, Oliy Majlis Nızamshılıq palatası deputatı, Nızamshılıq palatasınıń byudjet hám ekonomikalıq reformalar komiteti aǵzası. L.Seytova sózge shıǵıp búgingi abadan turmısımız, mámleketimiz erisip atırǵan jetiskenlikler Konstituciyamızda belgilep qoyılǵan, xalqımızdıń arzıw-úmitleri, búgingi hám keleshek máplerine juwap beretuǵın qaǵıyda hám principlerdiń qanshelli tuwrı ekenligin tastıyıqlap, jas áwladtı bárkamal qılıp tárbiyalaw, olardıń ómirge jeke qádem qoyıwları ushın barlıq zárúr shárayıtlardı jaratıwǵa qaratılǵan sistemalı jumıslar ámelge asırılıp atırılǵanı haqqında aytıp ótti. Sonıń menen birqatarda Jaslardı qollap-quwatlaw, olardıń huqıqıy sana-sezimine jáne asırıw, jámiyette jaslardı siyasiy belsendi qatlamǵa aylandırıw hám de olardıń siyasiy-huqıqıy bilim hám kónlikpelerin bayıtıw, nızamshılıq hám nızam dóretiwshiligi processine jaslardı tartıw hám qabıl qılınıp atırǵan nızamlardı jaslar arasında keń úgit násiyat etiw maqsetinde Ózbekstan Respublikasi Oliy Majlisi janında «Jaslar parlamenti» shólkemlestiriliwi bul jaslarǵa degen iseniminiń ayqın bir mısalı ekenin aytıp ótti.
Sonday-aq ushırasıwda Qaraqalpaqstan Respublikası Joqarǵı Keńesiniń nızamlılıq, sud huqıq hám korrupciyaǵa qarsı gúresiw máseleleri komiteti baslıǵı Z.Reymova óz bayanatında Ózbekstan Respublikasi Nızmshılıq palatası hám Senatı Keńesiniń 2022-jıl 20-may kúngi qararı menen Ózbekstan Respublikası Konstitutsiyasına ózgeris hám qosımshalar kiritiw boyınsha usınıslardı qáliplestiriw hám shólkemlestiriw is-ilajların ámelge asırıw boyınsha Konstituciya komissiya dúzilgenligi hám usı komissiya tárepinen 2022-jıl 24-maydan baslap keń jámáátshilikten usınıs hám pikirler jıynap atırǵanlıǵı, usı processte jaslardıń da belsendi qatnasıp, óz pikir usınısların beriwge shaqırıp, bulardıń bári Ózbekstan Respublikası Konstituciyası mámleketimizde barlıq salalardaǵı keń kólemli reformalardıń hám demokratiyalıq ózgerislerdiń huqıqıy tiykarı ekenliginen derek beretinligin bildirip ótti. Ushırasıwda student-jaslar ózleriniń qızıqtırǵan sorawlarına juwaplar aldı.
QMU Baspasóz xızmeti
