Usı jıldıń 11-iyun kúni sporttıń futbol túri boyınsha Qaraqalpaqstan XXIX milliy chempionatına start berildi. Bunday úlken turnir Qaraqalpaqstan Respublikası Sporttı rawajlandırıw ministrligi hám Qaraqalpaqstan futbol associaciyası, bir qatar shólkemler tárepinen ótkerilmekte.
Bul chempionatqa barlıq rayon, qala hám Joqarı oqıw orınları menen basqa da komandalar qatnasa aladı. Onda birinshi hám ekinshi orındı alǵan komandalar jarıstıń keyingi 1/8, 1/4, 1/2 hám final basqıshlarına jollama aladı. Yaǵnıy, oyınlar olimpiada sistemasında ótkeriledi.

Milliy chempionattıń birinshi oyınında QMU hám BOFA futbol komandaları óz-ara bellesti. Teń gúresler, tartısıwlar menen ótken oyında kóbirek ústinlik Universitet komandasında boldı. Oyınnıń dáslepki minutlarında Xojabek Bazarbaev qarsılas komandaǵa gol urdı. 1-taymnıń ortalarına kelip jáne sol oyınshı ekinshi golın urıwǵa eristi. 2-taymnıń dáslepki minutları jáne de qızıqlı bolıp ótti hám universitet futbol komandası qarsılas dárwazaǵa qaray 4 gol urdı. Bul gollarǵa, A.Ajvanbetov, P.Sultamuratov, A.Saburovlar iyelik etti. BOFA komandası qarsılas komandaǵa bir gol menen juwap bere aldı. Ushırasıwdıń qalǵan minutlarında bul esap ózgermedi.
Esletip ótemiz, bul úlken turnir usı jıldıń sentyabr ayına shekem dawam etedi hám 1,2,3-orınlardı iyelegen komandalar medal, kubok, diplom hám qımbat bahalı sawǵalar menen sıylıqlanadı.

Azizbek Dabılov,
QMUdıń Internet jurnalistikası tálim baǵdarınıń 3-kurs studenti,

Avtordıń túsirgen fotoları