«Náshebentlikke qarsı gúresiw aylıǵı» sheńberinde búgin Berdaq atındaǵı Qaraqalpaq mámleketlik universitetinde «Náshebentlikke qarsı gúresiw» atamasında úgit-násiyatlaw ilajı ótkerildi. Ilajda Qaraqalpaqstan Respublikası Ishki isler ministrliginiń jınayat-qıdırıw basqarması aǵa operativ wákili, Z.Saparbaev, Respublikalıq qánigelestirilgen norkologiya ilimiy ámeliy medicinalıq orayınıń Qaraqalpaqstan Respublikası aymaqlıq filialı norkolog vrachı U.Eshmuratov, Nókis qalası Muhammed Baqıy Iyshan meshiti imamı Sh.Qudaybergenov, Respublikalıq AIJS qarsı gúresiw orayı vrach lobarantı F.Tursınova, 1-sanlı respublikalıq ruwxıy kesellikler dispanseri vrachı I.Arzımov, sonday-aq, Qaraqalpaqstan Respublikası mámleketlik qáwipsizlik xızmeti wákili hám student-jaslar qatnastı. Ushırasıwdı universitetimizdiń ruwxıy-aǵartıwshılıq isleri boyınsha prorektorı S.Alauatdinov ashıp berdi hám alıp bardı.
Ilajda taraw qánigeleri tárepinen jaslar arasında narkotik zatlardıń tarqalıwına qarsı gúresiw, jaslardıń náshebentlikke berilmewi, narkotik zatlardıń zıyanlı aqıbetleri hám bunıń aqıbetinde jınayatshılıq hám huqıqbuzarlıq jaǵdayları kelip shıǵatuǵınlıǵı aytıp ótildi. Sonday-aq, taraw qánigeleri tárepinen bul jaman illettiń aldın alıw maqsetinde Respublika jasları salamatlıǵın kúsheytiw, bárkamal insan etip tárbiyalawǵa qaratılǵan ilajlar hám hár túrli sport túrlerinen jarıslar ótkeriliwin, jaslardıń sport sekciyalarına bekitiliwin, olardıń bos waqıtların mazmunlı shólkemlestiriw haqqında ayrıqsha atap ótildi.
Ilaj dawamında qánigeleri tárepinenen náshebentlik zatlarǵa qarsı gúresiwdi úgit-násiyatlawǵa qaratılǵan arnawlı video rolikler menen kórsetip hám túsindirip ótti. Ilajda student-jaslar ózleriniń qızıqtırǵan sorawlarına tiyisli juwaplar aldı.
Bul ilajdı ótkeriwden tiykarǵı maqset jaslar arasında narkotik zatlardıń tarqalıwına qarsı gúresiw hám aldın alıw, bul jaman illet boyınsha keńnen úgit-násiyat jumısların alıp barıw, sonıń menen birge jaslarımızdı zárúr maǵlıwmatlar menen tanıstırıp barıw bolıp tabıladı.
QMU Baspasóz xızmeti
