Universitet juwaplı xızmetkerleri arasında, Joqarı oqıw orınlarında korrupciyanıń aldın alıw hám de oǵan qarsı gúresiw boyınsha fakultetlerde ushırasıw kestesi tastıyıqlanǵan hám ótkeriw belgilengen. Usı tiykarda 2022-jıl 28-iyun kúni korrupciyanıń aldıń alıw hám oǵan qarsı gúresiw maqsetinde Dene mádeniyatı fakultetinde ushırasıw ótkerildi.
Ushırasıwǵa Dene mádeniyatı fakulteti dekanı N.Kaypov, universitet Korrupciyaǵa qarsı gúresiw «Kompleans qadaǵalaw» bólimi baslıǵı K.Uteniyazov, dekan orınbasarları, kafedra baslıqları, professor-oqıtıwshılar hám tyutorlar qatnastı. Ushırasıwda bayanatshılar korrupciyaǵa qarsı gúresiw «Kompleans qadaǵalaw» bólimi baslıǵı K.Uteniyazovlar sózge shıǵıp, elimizde ámelge asırılıp atırǵan reformalardıń nátiyjeliligin jáne de asırıw, jámiyetimizdiń jedel rawajlanıwı ushın shárayatlar jaratıw, mámleketimizdi modernizaciya qılıw hám barlıq tarawlardı liberallastırıw, nızamshılıqtı bekkemlew, sonday-aq, jámiyetimiz rawajlanıwı ushın korrupciyaǵa baylanıslı huqıqbuzarlıqlardıń aldın alıw, olardı anıqlaw hám toqtatıw, buǵan imkan beriwshi sebeplerdi saplastırıw boyınsha respublika boylap keń kólemli jumıslar ámelge asırılıp atırǵanlıǵın atap ótti. Korrupciya – rawajlanıw tosıǵı ekenligi, korrupciya hár qanday mámleket hám jámiyettiń siyasiy-ekonomikalıq rawajlanıwına úlken zıyan kórsetetuǵınlıǵı, mámlekettiń konstituciyalıq tiykarların hám nızam ústinligi, sonıń menen birge insan huqıqları hám erkinlikleriniń támiyinlenbewine alıp keletuǵınlıǵı, sol sebepli mámleketimizde korrupciyaǵa qarsı gúresiwdiń anıq sisteması jaratılǵanlıǵı, bul boyınsha kóplegen qararlar, pármanlar, nızamlar qabıl etilip atırǵanlıǵın aytıp ótti. Usı tiykarda profilaktikalıq úgit-násiyatlaw ilajlar alıp barılıwına qaramastan korrupciya menen baylanıslı huqıqbuzarlıqlar júz berip atırǵanlıqların anıq faktler menen keltirip ótti.
Bayanatshılar korrupciya jınayatınıń túsinigi, bul jaman illettiń aldın alıw hám oǵan qarsı gúresiw boyınsha usınısların bildirdi hám hár bir xızmetkerdiń watanǵa, óz kásibine bolǵan súyispenshiligin bekkemlew, hár túrli unamsız háreketlerdiń aldın alıw, professor-oqıtıwshılar ózlerin ilim-bilimdi rawajlandırıwǵa baǵıshlaw, jaslardı watanpárwarlıq ruwxında tárbiyalaw, olarda huqıqıy sana hám mádeniyattı, dúnyalıq, ilimiy hám ádep-ikramlılıq dárejesin asırıw hám de qáliplestiriw hár bir universitet xızmetkeriniń wazıypası ekenligin atap ótti.
Ushırasıw sońında qatnasıwshılar ózleriniń qızıqtırǵan sorawlarına tiyisli juwaplar aldı.
R.Óteniyazov
Dene mádeniyatı fakultetiniń
jaslar menen islesiw boyınsha dekan orınbasarı
