QMUniń Kórkem-óner fakultetinde korrupciyanıń aldın alıw hám oǵan qarsı gúresiw boyınsha ilaj bolıp ótti. Ushırasıwdı Kórkem-óner fakulteti jaslar menen islesiw boyınsha dekan orınbasarı I.Djumaniyazov ashtı hám alıp bardı. I.Djumaniyazov óz sózinde elimizde ámelge asırılıp atırǵan reformalardıń nátiyjeliligin jáne de asırıw, jámiyetimizdiń jedel rawajlanıwı ushın shárayatlar jaratıw, mámleketimizdi modernizaciya qılıw hám barlıq tarawlardı liberallastırıw, nızamshılıqtı bekkemlew, sonday-aq, jámiyetimiz rawajlanıwı ushın korrupciyaǵa baylanıslı huqıqbuzarlıqlardıń aldın alıw, olardı anıqlaw hám toqtatıw, buǵan imkan beriwshi sebeplerdi saplastırıw boyınsha respublika boylap keń kólemli jumıslar ámelge asırılıp atırǵanlıǵın atap ótti.
Sonday-aq, bul boyınsha fakultetimizde de nátiyjeli jumıslar alıp barılıp atırǵanlıǵı, huqıq qorǵaw organları xızmetkerleri, jámiyetlik shólkemler hám basqa da taraw qánigeleri menen birgelikte professor-oqıtıwshılar hám de student-jaslar arasında korrupciyanıń aldın alıwǵa qaratılǵan úgit-násiyatlaw ilajları ótkerilip atırǵanlıǵı hám bunday ilajlardı jáne de kúsheytiw arqalı fakultetimizde korrupciyanıń aldın alıw hám oǵan qarsı gúresiw hár birimizdiń wazıypamız ekenligin aytıp ótti.
Kún tártibindegi másele boyınsha bayanatshılar, Korrupciyaǵa qarsı gúresiw «Kompleans qadaǵalaw» bólimi baslıǵı K.Uteniyazovlar hám universitet profilaktikalıq inspektorı I.Erejepovlar sózge shıǵıp, korrupciya – rawajlanıw tosıǵı ekenligi, korrupciya hár qanday mámleket hám jámiyettiń siyasiy-ekonomikalıq rawajlanıwına úlken zıyan tásir etetuǵınlıǵı, mámlekettiń konstituciyalıq tiykarların hám nızam ústinligin sistemadan shıǵaratuǵınlıǵı, sonıń menen birge insan huqıqları hám erkinlikleriniń támiyinlenbewine alıp keletuǵınlıǵı, sol sebepli mámleketimizde korrupciyaǵa qarsı gúresiwdiń anıq sisteması jaratılǵanlıǵı, bul boyınsha kóplegen qararlar, pármanlar, nızamlar qabıl etilip atırǵanlıǵın keltirip ótti. Bul boyınsha universitette tárbiyalıq hám profilaktikalıq ilajlardı kúsheytiw, xızmetkerler hám studentlerdiń bul máselede juwapkershiligin arttırıw boyınsha bir qatar ilajlar ámelge asırılıwına qaramastan házirgi waqıtta ayırım professor-oqıtıwshılar, isshi xızmetkerler, hátteki student-jaslarda korrupciya menen baylanıslı huqıqbuzarlıqlardı ámelge asırılıp atırǵanlıqların anıq faktler menen aytıp ótti.
Bayanatshılar korrupciya jınayatınıń túsinigi, bul jaman illettiń aldın alıw hám oǵan qarsı gúresiw boyınsha usınısların bildirdi. Hár bir xızmetkerdiń watanǵa, óz kásibine bolǵan súyispenshiligin bekkemlew, universitet atına daq túsiriwshi hár túrli unamsız háreketlerdiń aldın alıw, professor-oqıtıwshılar ózlerin ilim-bilimdi rawajlandırıwǵa baǵıshlaw, jaslardı watanpárwarlıq ruwxında tárbiyalaw, olarda huqıqıy sana hám mádeniyattı, dúnyalıq, ilimiy hám ádep-ikramlılıq dárejesin asırıw hám de qáliplestiriw hár bir universitet xızmetkeriniń wazıypası ekenligin atap ótti. Ushırasıw sońında qatnasıwshılar ózleriniń qızıqtırǵan sorawlarına tiyisli juwaplar aldı.
