Búgin Berdaq atındaǵı Qaraqalpaq mámleketlik universitetinde «Tınıshlıq hám tatıwlıq biybaha baylıq» atamasında ushırasıw bolıp ótti. Onda Ózbekstan Respublikası Oliy Majlis Senatı aǵzası B.Matmuratov, Qaraqalpaqstan Respublikası Joqarǵı Kenesi deputatı, Berdaq atındaǵı Qaraqalpaq mámleketlik universiteti rektorı A.Reymov, Nókis qalası IIB baslıǵı Z.Zaytov, Fizika-matematika ilimleriniń kandidatı, professor B.Abdikamalov hám universitettiń professor oqıtıwshıları qatnastı. Ushırasıwdı universitetimizdiń rektorı A.Reymov ashıp berdi hám alıp bardı.
Dáslep ol óz sózinde insannıń jaqsı jasawı kámil insan bolıp jetilisiwinde densawlıq hám tınıshlıq úlken áhmiyetke iye ekenligi haqqında aytıp, jaqındaǵana elimizde bolǵan kewilsiz waqıyalar hámmemizdi úlken táshwishke salǵanın, bul waqıya tekǵana jası úlkenlerdi emes hátteki ósip kiyatırǵan jaslarımızdı da tınıshlıqtıń qádirine jetiwine shúkiranalıq tuyǵusın payda etkenligin aytıp ótti. Bunnan soń Ózbekstan Respublikası Oliy Majlis Senatı aǵzası, B.Matmuratov sózge shıǵıp, Húrmetli Prezidentimiz birinshi náwbette tınıshlıq hám tatıwlıq kerek, onı asırap-abaylaw hámmemizdiń minnetimiz bolıw kerek ekenligin, sonday-aq, mámleketimizde ámelge asırılıp atırılǵan reformalar, jaslarımızǵa berilip atırılǵan imkaniyatlar haqqında toqtalıp ótti. Sonday-aq Qaraqalpaqstan Respublikasındaǵı sońǵı jıllarda misli kórilmegen ózgerisler, Moynaq, Bozataw rayonlarında alıp barılıp atırılǵan jańalanıwlar haqqında keń jámiyetshilikke túrli mısallar menen túsindirip ótti.
Ushırasıwda Nókis qalası IIB baslıǵı Z.Zaytov sózge shıǵıp, bolıp ótken waqıyalar haqqında toqtalıp, bunda kópshilik insanlar bilip bilmey aralasıp qalǵanlıǵı, bul boyınsha sorastırıw jumıslarıp alıp barılǵanlıǵı, sonıń menen bir qatarda Qaraqalpaqstanda ayrıqsha jaǵday biykar etilgenligin aytıp óttip hám puqaralardan social tarmaqlardaǵı hár qıylı tastıyıqlanbaǵan, anıqlanbaǵan maǵlıwmatlarǵa isenbesten arnawlı «call center»ǵa baylansıwın aytıp ótti. Ushırasıwda universitetimizdiń professor-oqıtıwshıları B.Abdikamalov, Sh.Abdinazimov, Q.Járimbetovlar sózge shıǵıp, tınıshlıq hám tatıwlıq qádiri, mámleketimizde ámelge asırılıp atırılǵan reformalar, jaslarımızǵa berilip atırǵan imkaniyatlar sonday-aq, jámiyette bilim alaman, óner úyrenemen degen hár bir insanǵa mámleketimizde keń imkaniyatlar jaratılıp berilgeni haqqında aytıp ótti.
QMU Baspasóz xızmeti
