Aldın xabar bergenimizdey Berdaq atındaǵı Qaraqalpaq mámleketlik universiteti tárepinen 2022/2023 oqıw jılı ushın usı jıldıń 1-5-avgust kúnleri aralıǵında kásiplik (dóretiwshilik) imtixanlarınıń ótkeriliwi boyınsha keste tastıyıqlanǵan edi. Usı kestege muwapıq búgin Dene mádeniyatı tálim baǵdarında azanǵı saat 06:00de hám Jurnalistika tálim baǵdarına saat 08:00de dóretiwshilik imtixanları baslandı.
Bul imtixanlardı ótkeriw waqtında jámiyetshilik qadaǵalaw, imtixanlardı ádil hám ashıq-aydınlıqtı támiyinlew, nızam talapların saqlaǵan halda ótkeriw maqsetinde imtixanlarǵa Ózbekstan Respublikası Joqarı hám orta arnawlı bilimlendiriw ministrliginen bir qatar wákiller sonday-aq, Nókis qalalıq deputatları qatnaspaqta. Kásiplik (dóretiwshilik) imtixanları ótkeriletuǵın orınlarda abiturientler hám olardıń ata-anaları ushın barlıq qolaylıqlar jaratılǵan. Sonıń menen bir qatarda imtixan ótkeriletuǵın orınlar kameralar menen támiyinlengen bolıp, internet arqalı tuwrıdan tuwrı onlayn rejimde baqlap barıw imkaniyatı jaratıldı. Haqıyqatında da ádil hám ashıq-aydınlıq tárizde ótkerilip atırǵan imtixanlar haqıyqıy óz bilimi hám sporttaǵı joqarı sheberligi bar jaslar ushın jáne bir jaqsı imkaniyat bolıp tabıladı.
Maǵlıwmat ushın Berdaq atındaǵı Qaraqalpaq mámleketlik universitetinde 2022-2023-oqıw jılı ushın kásiplik (dóretiwshilik) imtixanları usı jıldıń 5-avgust sánesine shekem dawam etedi.
QMU Baspasóz xızmeti.
