Usı jıldıń 5-6-avgust kúnileri Berdaq atındaǵı Qaraqalpaq mámleketlik universitetinde “Tınıshlıqtıń qádirine jetip jasayıq!” atamasında ushırasıw bolıp ótti. Ilajda Prorektorlar, fakultet dekanları, professor-oqıtıwshılar, tyutorlar, student-jaslar hám ata-analar qatnastı. Ushırasıwda Berdaq atındaǵı Qaraqalpaq mámleketlik universiteti rektorı A.Reymov shıǵıp sóylep, usı jıldıń 1 hám 2-iyul kúnleri Nókis qalasında bolıp ótken kewilsiz waqıyalar bársheni birdey táshwishke salıp, bul waqıyalarǵa kópshilik jaslarımız bilip bilmey aralasıp qalǵanlıǵı, ásirese student-jaslarımızdıń aralasıp qalǵanı ashınarlı jaǵday ekenligin aytıp ótti. Sonlıqtan bunday jaǵdaylardı boldırmaw maqsetinde, aldaǵı waqıtları qıraǵılıqtı asırıw, studentler, ata-analar hám professor-oqıtıwshılar tıǵız baylanısta bolıwı kerek ekenligin aytıp ótti.
Sonıń menen bir qatarda Húrmetli Prezidentimiz tárepinen Qaraqalpaqstan Respublikasında sońǵı jıllarda misli kórilmegen ózgerisler, Moynaq, Bozataw rayonlarında alıp barılıp atırılǵan jańalanıwlar, Elimizde túrli millet wákilleriniń awızbirshilikte tatıwlıqta, azat hám abat ómir keshirip atırǵanı haqqında keń jámiyetshilikke túrli mısallar menen túsindirip ótti. Bunnan soń, sózge shıqqanlar, tınıshlıqtıń qádirine jetip jasaw qanshelli áhmiyetli ekenligin hám social tarmaqlardaǵı hár qıylı tastıyıqlanbaǵan, anıqlanbaǵan maǵlıwmatlarǵa isenbew kerek ekenligin, jalǵan xabarlardı keń jámiyetshilikke tarqatıw jınayat ekenligin eskertip ótti.
Sonday-aq, ilajda Yuridika fakulteti dekanı E.Qutıbaeva sózge shıǵıp, Mámleketimizde ámelge asırılıp atırılǵan reformalar, jaslarımızǵa berilip atırılǵan imkaniyatlar, bilim alaman, óner úyrenemen degen hár bir insanǵa mámleketimizde keń imkaniyatlar jaratılıp berilgeni haqqında aytıp ótti.
QMU Baspasóz xızmeti
