Usı jıldıń 22-avgust kúni Nókis qalası «Jańabazar» MPJ aymaǵında «Jańa Ózbekstanda el áziz, insan áziz» atamasında ilaj bolıp ótti. Ilajda Qaraqalpaqstan Respublikası Ministrler Keńesiniń Baslıǵı, Ministrler Keńesi Baslıǵınıń orınbasarları, rayon hákimleri, universitet rektorı hám aymaq turǵınları qatnastı.

Sonday-aq, ilajda Qaraqalpaqstan Respublikası Ministrler Keńesiniń Baslıǵı Q.Sariev shıǵıp sóylep, bárshe aymaq turǵınların Ózbekstan Respublikası Ǵárezsizliginiń 31 jıllıq bayramı menen qızǵın qutlıqlap, sońǵı jılları Respublikamızda keń kólemli qurılıs hám abadanlastırıw jumısları alıp barılıp atırılǵanlıǵı, usı tiykarda «Jańabazar» MPJ aymaǵında da keń kólemli jumıslar ámelge asırılıp, bul alıp barılıp atırǵan abadanlastırıw jumısları aldaǵı waqıtları elede dawam etetuǵınlıǵın atap ótti hám usı jumıslarda belsendilik kórsetip atırǵan puqaralarǵa minnetdarshılıq bildirdi.

Sonıń menen bir qatarda, «Jańbazar» MPJ nuraniyları sózge shıǵıp, búgingi aymaqta ámelge asırılıp atırılǵan jumıslardan bárshe aymaq turǵnlarınıń quwanıshı sheksiz ekenin, bunıń ushın Respublikamız basshılarına óz minnetdarshılıǵın bildirdi. Bunnan soń «Jańa Ózbekstanda el áziz, insan áziz» atamasında ótkerilgen ilaj Berdaq atındaǵı Qaraqalpaq mámleketlik universiteti jámááti tárepinen tayarlanǵan koncert baǵdarlaması menen dawam etti. Koncertte ózbek, qazaq, turkmen, hám qaraqalpaq xalıq qosıqları, milliy ayaq oyınları, Watan, ǵárezsizlik, tınıshlıq, abadanlıq, jaslıq haqqındaǵı qosıq hám namalar atqarılıp, keshe qatnasıwshılarına ózgeshe zawıq baǵıshladı.

Ilaj dawamında aymaq jasları arasında ótkerilgen sport jarıslarında jeńimpaz bolǵanlar hám alıp barılıp atırǵan abadanlastırıw jumıslarında belsendilik kórsetip atırǵan puqaralar sıylıqlandı.

QMU Baspasóz xızmeti