Elimizde sońǵı jıllarda ilimiy-izertlew hám innovaciya iskerligin xoshametlew, ilimiy hám innovaciya jetiskenliklerin ámeliyatqa engiziwdiń nátiyjeli mexanizmlerin jaratıw maqsetinde joqarı oqıw orınları hám ilimiy-izertlew institutları janında qánigelestirilgen ilimiy-eksperimental laboratoriyalar, joqarı texnologiya orayları  hám texnoparklar shólkemlestirilmekte. Mine, usınday ilajlardıń biri retinde, 2022-jıl 23-avgust kuni Nókis jaslar texnoparki imaratınıń ashılıw máresimi hámde “Innoweek-2022” innovaciyalık ideyalar kórgizbesi bolıp ótti. 

Ministrler Keńesi Baslıǵınıń orınbasarı, Investiciya hám sırtqı sawda ministri Xabibullaev Baxıtjan Sagidullaevich óz kiris sózi menen “Innoweek-2022” innovaciyalıq ideyalar kórgizbesi xam Nókis jaslar texnoparki imaratın rásmiy ashıp berdi.

Bunnan soń Innovaciyalıq rawajlanıw ministrligi janındaǵı Innovaciyalardı engiziw hám texnologiyalar transferi milliy ofisi Bas direktorı Tuychiev Olimjon Alijonovich sózge shıǵıp aymaqlarda ótkerilip atırǵan “Innoweek” innovaciyalıq ideyalar hápteligi maqseti, onıń aymaqlarda ilimiy hám innovciyalıq iskerlikti rawajlandırıwǵa sonıń menen birge pán, tálim hám islep shıǵarıwdagı integraciyasın ámelge asırıwda áhmiyetli ornı xakkında  pikirlerin bildirip ótti.

Bunnan keyin Ózbekstan Respublikası suw xojalıǵı ministriniń birinshi orınbasarı Nazarov Azimjon Soatmurod ulı hámde Ózbekstan Respublikası Ekologiya hám qorshaǵan ortalıqtı qorǵaw mámleket komiteti baslıǵı orınbasarı Kazbekov Jusipbek Sıdikbekovich sózge shıǵıp qatnasıwshılardı “Nókis jaslar texnoparki imaratınıń ashılıwı menen qutlıqlaǵan halda  “Innoweek-2022” innovaciyalıq ideyalar kórgizbesinde hámmeni belsendi túrde qatnasıwǵa shaqırdı.

“Innoweek-2022” innovaciyalıq ideyalar kórgezbesine respublikamızdaǵı barlıq joqarı oqıw orınları, ilim-izertlew institutları hámde jeke isbilermenlik subektlerinen professor-oqıtıwshılar, student jaslar, isbilermenler ózleriniń ilimiy-innovaciyalıq islenbeleri menen qatnaspaqta.

Atap aytqanda Qaraqalpaq mámleketlik universiteti Ilimiy isler hám innovaciyalar boyınsha prorektorı I.Turdımambetov basshılıǵında professor-oqıtıwshılar hámde student jaslar ózleriniń tómendegi innovaciyalıq islenbeleri menen qatnaspaqta:

1. “IJDAN” ısıtıw úskenesi (Arxitektura kafedrası úlken oqıtıwshısı Kaliev Nadjibulla);
2. “Islep shıǵarıw kárxanalarında gaz sarıplanıwın tejemli úskene (Gorelka)” (Arxitektura kafedrası úlken oqıtıwshısı Kaliev Nadjibulla);
3. “Vita Karakalpak MA4” azıqlıq ónimi (Biologiya ilimleri doktorı, professor Allaniyazova Mapruza);
4. “Mayıplar arbashası ushın tirkeme” (Qurılıs fakulteti pitkeriwshi kurs studentleri Jumamuratov Begdiyar hám Maxambetaliev Arif-Xajıy);
5. “Omırtqa kesellikleriniń kóbeyip ketiwiniń aldın alıwshı medicinalıq matras” (Qurılıs fakulteti tyutorı Ubaydullaev Begdulla);
6. Hárkıylı aǵash shıǵındılarınan islengen briket (Arxitektura hám Tariyx fakultetleri studentleri Jalgashov Aybek hám Turǵanbaev Dastan);
7. “Innovaciyalıq keramikalıq gerbish” (Arxitektura fakulteti studenti Piyshenbaev Qarjawbay);
8. “Orfo-qaraken” MS Office dastúri ushın programma (Matematika fakulteti studenti Qoǵambaev Asadbek).

“Innoweek-2022” innovaciyalıq ideyalar kórgizbesi kóterińki ruwxta ótkerilmekte hámde kórgizbe sheńberinde ótkerilip atırǵan is-ilajlar 24-avgust kúni de dawam ettiriledi.