Elimizde sońǵı jıllarda ilimiy-izertlew hám innovaciya iskerligin xoshametlew, ilimiy hám innovaciya jetiskenliklerin ámeliyatqa engiziwdiń nátiyjeli mexanizmlerin jaratıw maqsetinde joqarı oqıw orınları hám ilimiy-izertlew institutları janında qánigelestirilgen ilimiy-eksperimental laboratoriyalar, joqarı texnologiya orayları hám texnoparklar shólkemlestirilmekte. Mine, usınday ilajlardıń biri retinde, 2022-jıldıń 23-avgust kuni ashılǵan Nókis jaslar texnoparkin aytıp ótsek boladı. Bul imaratta 2022-jıldıń 23-24-avgust kúnlerinde “Innoweek-2022” aymaqlıq innovaciyalık ideyalar kórgizbesi bolıp ótti. 

 “Innoweek-2022” aymaqlıq innovaciyalıq ideyalar kórgizbesi sheńberinde “TechnoWays” texnologiyalıq rawajlanıw marafonı ótkerildi. Bul tańlawǵa respublikamızdaǵı barlıq joqarı oqıw orınlarınan ziyrek student jaslar ózleriniń ilimiy-innovaciyalıq islenbeleri menen qatnastı.

Tańlawǵa Matematika fakulteti studenti Qogambaev Asadbek “Orfo-qaraken” (MS Office dastúri ushın programma) joybarı menen qatnastı. Tóreshiler quramı tárepinen onıń joybarı joqarı bahalanıp 2-orındı jeńip alıwǵa eristi hámde Tashkent qalasında ótkeriletuǵın “TechnoWays” texnologiyalıq rawajlanıw marafonı tańlawınıń juwmaqlawshı respublikalıq basqıshına jollanba aldı.

Sonday-aq, “Innoweek-2022” aymaqlıq innovaciyalıq ideyalar kórgizbesine belsendi qatnasqan Arxitektura kafedrası úlken oqıtıwshısı Kaliev Nadjibulla, Qurılıs fakulteti pitkeriwshi kurs studenti Jumamuratov Begdiyar hám basqalar arnawlı sertifikatlar menen sıylıqlandı.

 “Innoweek-2022” aymaqlıq innovaciyalıq ideyalar kórgizbesi hám “TechnoWays” texnologiyalıq rawajlanıw marafonı tańlawı kóterińki ruwxta ótkerildi.