Búgin Berdaq atındaǵı Qaraqalpaq mámleketlik universitetinde 2022/2023 taza oqıw jılı aldınan huqıq qorǵaw uyımları xızmetkerleri qatnasında ushırasıw bolıp ótti. Onda Ózbekstan Respublikası IIM jámiyetlik qawipsizligi deportamenti, huqıqbuzarlıqlar profilaktikası basqarması jaslar menen islesiw boyınsha bólim baslıǵı podpolkovnik B.Sultanov, Qaraqalpaqstan Respublikası IIM jamiyetlik qawipsizligi xızmeti baslıǵı orınbasarı huquqbuzarlıqlar profilaktikası basqarması baslıǵı orınbasarı podpolkovnik B.Orınbaev, universitet prorektorlar, barlıq fakultet dekanları, professor-oqıtıwshılar hám tyutorlar qatnastı. Ilajda universitet rektor A.Reymov sózge shıǵıp, búgingi kúnde jaslar arasında hár túrli jınayat hám huqıqbuzarlıqlardıń ushırasıp atırǵanlıǵı, bul jınayatlardıń aldın alıw boyınsha qánigeler tárepinen bir qansha ilajlar, túsindiriw jumısları alıp barılıp atırǵanlıǵı haqqında keńnen túsinikler berip ótti.
Bunnan soń, Ózbekstan Respublikası IIM jámiyetlik qawipsizligi deportamenti, huqıqbuzarlıqlar profilaktikası basqarması, jaslar menen islesiw boyınsha bólim baslıǵı podpolkovnik B.Sultanov sózge shıǵıp, búgingi kúnde mámleketimizde jınayatshılıq hám huqıqbuzarlıqtıń aldın alıw baǵdarında ámelge asırlıp atırılǵan reformalar, bunday jınayatshılıq hám huqıqbuzarlıqqa qarsı gúresiw maqsetinde kóplep nızam hújjetler qabıl etilip, bir qansha ilajlar ámelge asırılıp atırılǵanlıǵın boyınsha óz bayanatında keltirip ótti. Ushırasıwdı ótkeriwden maqset 2022-2023-jıl jańa oqıw jılı dawamında student-jaslar arasında huqıqbuzarlıq hám jınayatshılıqtıń erte aldın alıw, student-jaslar tárepinen jınayatshılıq hám huqıqbuzarlıqtıń juz beriw sebepleri olardı óz waqtında anıqlaw hámde saplastırıw boyınsha universitet jámááti menen birgelikte universitet profilaktika inspektorı, máhálle belsendileri, máhálle profilaktika inspektorı, hayal-qızlar menen birge islesiw boyınsha mexanizmin jánede jedellestiriw, student-jaslardıń huqıqıy bilimin, huqıqıy sanasın hám huqıqıy mádeniyatın qáliplestirip barıw, olardın bos waqıtların mazmunlı ótkeriwin shólkemlestiriw bolıp tabılıdı.
Ilajda dawamında kún tártibindegi másle tiykarında juwaplı xızmetkerlerge tiyisli tapsırmalar berildi. Sonday-aq ushırasıw qatnasıwshıları ózleriniń qızıqtırǵan sorawlarına taraw qániygeleri tárepinen tolıq juwaplar aldı.
QMU Baspasóz xızmeti
