Búgin Berdaq atındaǵı Qaraqalpaq mámleketlik universitetinde Ózbekstan Respublikası Prezidentiniń 213-sanlı pármanınıń mazmunı hám áhmiyeti haqqında keń jámiyetshilikke túsindiriw boyınsha ilaj bolıp ótti. Onda universitetimizdiń prorektorları, fakultet dekanları hám professor-oqıtıwshılar qatnastı. Ilajda universitet rektorı A.Reymov sózge shıǵıp Ózbekstan Respublikası Prezidentiniń 2022 jıl 31 avgust kúni tastıyıqlanǵan «Qaraqalpaqstan Respublikasında isbilermenlik, innovaciyalıq texnologiyalar hám infrastrukturanı jedel pátlerde rawajlandırıw arqalı xalıqtıń abadanlıǵın arttırıwdıń qosımsha ilajları haqqında»ǵı Pármanınıń mazmunı, sonday-aq, Qaraqalpaqstan Respublikasında bilimlendiriw tarawında qosımsha imkaniyatlar hám insan kapitalı rawajlanıwın jańa basqıshqa kóteriwge sharayat jaratıw baǵdarındaǵı imkaniyatlar haqqında aytıp ótti.
Bunnan soń, Qaraqalpaq mámleketlik universiteti professorı, Qaraqalpaqstan Respublikasına miyneti sińgen ekonomist G.Ótemuratova sózge shıǵıp, 2022/2023-oqıw jılı ushın Qaraqalpaqstan Respublikasında ulıwma orta, orta-arnawlı hám professional bilimlendiriw mákemelerin tamamlaǵan 500, keyingi jıllardan baslap 6500 jaslardıń wálayatlardaǵı mámleketlik joqarı bilimlendiriw mákemelerine qosımsha qabıllaw parametrleri tiykarında oqıwǵa qabıl etiw, bul qabıllaw kórsetkishleri boyınsha oqıwǵa qabıllanǵan studentlerge ajıratılǵan tálim kreditleri boyınsha procent tólemlerin Qarjı ministrligi janındaǵı Tálim kreditin qarjılandırıw qorınıń esabınan qaplap beriliwi hám Qaraqalpaqstan Respublikasındaǵı mámleketlik joqarı bilimlendiriw mákemelerin kúshli professor-oqıtıwshılar menen támiyinlew maqsetinde mámleketimizdiń jetekshi joqarı oqıw orınlarında ekologiya, awıl xojalıǵı, irrigaciya hám qurılıs baǵdarları boyınsha 2023-jıldan baslap, tayanısh doktoranturada kadrlardı maqsetli tayarlawdı jolǵa qoyıw sıyaqlı wazıypalardıń belgilep beriliwi, soıń menen bir qatarda Pármannıń hár bir bántinde keltirilgen salıq jeńillikleri, fermer xojalıqlarına ajıratılatuǵın subsidiyalar haqqında arnawlı slaydlarda túsindirip ótti. Ilaj dawamında qatnasıwshılar Pármanda keltirilgen barlıq tarawlarǵa berilip atırılǵan imkaniyatlardı keńnen dodalap, ózleriniń qızıqtırǵan sorawlarına juwaplar aldı.
QMU baspasóz xızmeti
