Búgingi kúnde mámleketimizde bilimlendiriw tarawın rawajlandırıw, jańa reformalardı ámelge asırıw mámleket siyasatınıń baslı baǵdarlarınan birine aylandı. Húrmetli Prezidentimizdiń mámleketimizde bilimlendiriw tarawına bolǵan ayrıqsha itibarı, atap aytqanda, student-jaslardıń joqarı bilim alıwları ushın kórsetip atırǵan ǵamxorlıǵı, xalıqshıl siyasatı nátiyjesinde búgin Berdaq atındaǵı Qaraqalpaq mámleketlik universitetinde «Talabaga madad» joybarı ótkerildi. Ilajda Ózbekstan Respublikası Jaslar isleri agentligi direktorı A.Sadullaev Tashkent qalasınan turıp onlayn qatnasıp, Ministrler Kabinetiniń 2022-jıl 7-iyun kúngi 312-sanlı qararı tiykarında universitettiń 360 student-jaslarına kontrakt pulları tólep berilip atırılǵanlıǵı, sonday-aq, bul berilip atırılǵan imkaniyatlardan aqılǵa muwapıq paydalanıp, keleshekte elimizge paydası tiyetuǵın kadrlar bolıp jetilsiwine isenim bildirip, aldaǵı oqıwlarında tabıslar tiledi. Bunnan soń, Berdaq atındaǵı Qaraqalpaq mámleketlik universiteti rektorı A.Reymov sózge shıǵıp, Húrmetli Prezidentimizdiń mámleketimizde bilimlendiriw tarawına bolǵan ayrıqsha itibarı, atap aytqanda, 2022/2023 oqıw jılı ushın barlıq baǵdarlar boyınsha tólemli-kontrakt muǵdarları asırılmaytuǵınlıǵı, bul óz gezeginde jaslarǵa bolǵan úlken itibar ekeni, sonıń menen bir qatarda 360 student jastıń kontrakt pulların tólep beriliwi jámiyetimizde oqıp bilim alaman degen jaslarǵa keń múmkinshilik ekenligin aytıp, bunday ǵamxorlıqları ushın Húrmetli Prezidentimizge, El basshılarına hám jaslardı hár tárepleme qollap-quwatlap atırǵanı ushın, Jaslar isleri agentligine óz minnetdarshılıǵın bildirdi. Ilaj dawamında student-jaslar mámleketimiz tárepinen jaslarǵa qaratılıp atırǵan itibar hám ǵamxorlıqlardan sheksiz minnetdar ekenin bildirip, óz minnetdarshılıqların bildirdi.