Búgin Berdaq atındaǵı Qaraqalpaq mámleketlik akademiyalıq muzıkalı teatrında Ózbekstan Respublikası Ilimler Akademiyasınıń akademigi, Qaraqalpaqstan Respublikasına xızmet kórsetken ilim ǵayratkeri, filologiya ilimleriniń doktorı, professor Abatbay Dáwletovtıń 80 jıllıq yubileyine arnalǵan «Ilim hám bilimlendiriw pidayısı» atamasındaǵı respublikalıq ilimiy-teoriyalıq konferenciya bolıp ótti. Onda ilimpazlar, professor-oqıtıwshılar, nuraniylar, student-jaslar hám ǵalaba xabar qurallarınıń wákilleri qatnastı. Konferenciyanı universitetimizdiń rektorı Axmed Reymov ashıp berdi hám alıp bardı. A.Reymov óz sozinde Ilim hám bilimlendiriw tarawında ilimge óziniń pútkil ómirin arnaǵan, onı jekke mápten kóre ulıwmaxalıqlıq máp ushın xızmet etiwdey ullı maqsetler jolında pidá etken Qaraqalpaq til biliminiń rawajlanıwına óziniń salmaqlı úlesin qosqan belgili ilimpaz, ustaz, filologiya ilimleriniń doktorı, professor, Ózbekstan Ilimler Akademiyasınıń akademigi, Qaraqalpaqstan Respublikasına xızmet kórsetken ilim ǵayratkeri Abatbay Dáwletovtıń miynetlerin ayrıqsha maqtanısh penen atap otti.
Ol insannıń miynet jolına názer salıp, ilimiy miynetleri menen qaraqalpaq til bilimi tariyxında óshpes iz qaldırǵanı, ilimpazdıń sabaqlıq hám oqıw-qollanbaları, ilimiy-metodikalıq miynetleri respublikamızdıń úzliksiz bilimlendiriw basqıshlarında áhmiyetli oqıw ádebiyatları sıpatında búgingi kúnde qollanılıp kiyatırǵanlıǵın aytıp ótti. Sonday-aq kóplegen jaslardıń ustazı, óz isiniń haqıyqıy pidayısı bolǵan insan Abatbay Dáwletovtı 80 jıllıq yubileyi menen universitetimiz jámááti atınan qızǵın qutlıqlap, ustazdıń talapshańlıǵı, pidayılıǵı, onıń islegen qayırlı isleri, keleshek áwladtıń máńgi yadında saqlanıp qalatuǵındıǵın aytıp, búgingi ótkerilip atırılǵan «Ilim hám bilimlendiriw pidayısı» atamasındaǵı respublikalıq ilimiy-teoriyalıq konferenciya jumıslarına tabıslar tiledi.
Konferenciyada Qaraqalpaqstan Respublikası Joqarǵı Keńesiniń Komitet baslıǵı D.Qurbaniyazov shıǵıp sóylep, yubiley múnásibeti menen Qaraqalpaqstan Respublikası Joqarǵı Keńesiniń qutlıqlawın oqıp esittirip, konferenciya jumıslarına tabıslar tiledei. Bunnan soń, Konferenciyada Qaraqalpaq mámleketlik universiteti Qaraqalpaq til bilimi kafedrası baslıǵı, professor, filologiya ilimleriniń doktorı M.Qudaybergenov, Qaraqalpaqstan Jazıwshılar awqamı baslıǵı K.Karimov, QMU professorları B.Abdikamalov, Q.Orazımbetov, NMPI Qaraqalpaq tili kafedrasınıń docenti, filologiya ilimleriniń doktorı A.Pirniyazovalar akademik A.Dáwletovtıń miynet jolı, onıń bilimlendiriw tarawına qosqan úlesi haqqında toqtalıp, búgingi sáne múnásibeti menen óz qutlıqlawların bildirdi. Mámleketti – qúdiretli, milletti – ullı etetuǵın kúsh, bul – ilim-bilim, tálim hám tárbiya ekenligi dáliyl talap etilmeytuǵın haqıyqatlıq. Jańa Ózbekstanda ilim-bilimge itibar joqarı shıńǵa shıqtı desek asıra aytqan bolmaymız. «Ilim hám bilimlendiriw pidayısı» atamasındaǵı respublikalıq ilimiy-teoriyalıq konferenciya jumıslarında tabıslar tilep qalamız.
