Búgin Berdaq atındaǵı Qaraqalpaq mámleketlik universitetinde Ózbekstan Respublikası Ministrler Kabineti janındaǵı Joqarı Attestaciya komissiyası baslıǵı A.Yusupov, Joqarı Attestaciya komissiyası eksperti T.Mamatmusaev hám universitet rektorı A.Reymovlar tárepinen universitet jas alımları, tayanısh doktorantlar, doktorantlar, izleniwshiler, sonday-aq, universitet janında jumıs alıp barıp atırǵan ilimiy dárejeler beriwshi ilimiy keńesler baslıqları hám xatkerleriniń qatnasıwında ushırasıw bolıp ótti.
Ushırasıwdı universitet rektorı A.Reymov ashıp, búgingi kúnde ilim bilimlendiriw tarawındaǵı jańalıqlar, olardıń ilim menen shuǵıllanıp atırǵan ilimpazlar ushın áhmiyeti tuwralı aytıp ótti. Bunnan soń, Ózbekstan Respublikası Ministrler Kabineti janındaǵı Joqarı Attestaciya komissiyası baslıǵı A.Yusupov shıǵıp sóylep, respublika joqarı oqıw orınları hám ilimiy izertlew mákemelerinde, solar qatarında universitette keyingi jıllarda ilimiy dárejeler hám ilimiy ataqlar ushın dissertaciyalar jaqlaw kórsetkishi bir qansha joqarı dárejede alıp barılıp atırılǵanlıǵın, bul bolsa, basqa joqarı oqıw orınları qatarında Qaraqalpaq mámleketlik universitetiniń ilimiy potencialınıń artıwına túrtki bolǵanlıǵın atap ótti.
Sonıń menen birge, universitette joqarı bilimnen keyingi bilim institutında tálim alıp atırǵan jas alımlar, izleniwshiler, tayanısh doktorantlar, doktorantlar hám basqa da ilimiy dárejege talabanlardıń óz ilimiy jumıslarında júzege kelip atırǵan máseleler, olardı saplastırıwga baylanıslı óz-ara sorawlar berilip, oǵan bayanatshı tárepinen tiyisli juwaplar alındı. Sonıń menen birge, universitet janındaǵı ilimiy dárejeler beriwshi ilimiy keńesler jumısları boyınsha aldaǵı wazıypalar da belgilenip, bul baǵdardaǵı isleniwi tiyis jumıslar da usı ushırasıwda keń túrde talqılandı.
